Մարտի 18-ին Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Հայաստանի Հանրապետությունում Արաբական Միացյալ Էմիրությունների արտակարգ եւ լիազոր դեսպան Մուհամմադ Ալ Զաաբիին:
Մայր Աթոռի տեղեկատվական համակարգից NEWS.am-ին հայտնում են, որ շնորհավորելով դեսպանին նշանակման կապակցությամբ` Նորին Սրբությունը նրան մաղթեց արդյունավետ գործունեություն ի նպաստ հայ-արաբական գործակցության առավել սերտացման:
Զրույցի ընթացքում Վեհափառ Հայրապետն ընդգծեց, որ հայ-արաբական հարաբերությունները դարերի պատմություն ունեն` երախտագիտությամբ արձանագրելով նաեւ այն փաստը, որ Հայոց ցեղասպանությունից հետո բազմաթիվ հայորդիներ ապաստան են գտել արաբական երկրներում: Նորին Սրբությունը գոհունակությամբ անդրադարձ կատարեց երկու երկրների միջեւ այսօր առկա համագործակցությանը:
Դեսպան Մուհամմադ Ալ Զաաբին, ուրախություն հայտնելով հանդիպման առիթով, խոսեց իր ծրագրերի մասին: Վերջինս Ամենայն Հայոց Կաթողիկոսին նաեւ տեղեկացրեց, որ Արաբական Միացյալ Էմիրությունները 2019 թ. երկրում հռչակել են որպես հանդուրժողականության տարի:
Այս առիթով Վեհափառ Հայրապետը եւ դեսպանն անդրադարձան պետությունների եւ ժողովուրդների միջեւ հանդուրժողականության ոգու հաստատման կարեւորությանը՝ իբրեւ խաղաղ համակեցության երաշխիք, ինչպես նաեւ կրոնների դերակատարությանը մարդկային կյանքում սիրո, փոխադարձ հարգանքի եւ համերաշխության առատացման գործում: Կարեւորվեցին այս ուղղությամբ իրականացվող ծրագրերը:
