Նիդեռլանդների ոստիկանությունը կալանավորել է Ուտրեխտ քաղաքում տրամվայում հրաձգության կասկածյալին։ Հոլանդիայի իշխանությունները Ուտրեխտում սպառնալիքի մակարդակը նվազեցրել են մինչեւ չորրորդ աստիճան՝ հայտնում է AP-ը։
Երկրում ահաբեկչության դեմ պայքարի համակարգողը հայտարարել է, որ սպառնալիքի մակարդակի նվազեցումը կապված է «գլխավոր կասկածյալի ձերբակալության հետ»։
Ոստիկանության տվյալներով, հրաձգության հետեւանքով զոհվել է երեք մարդ, հինգ մարդ վիրավորվել է։ Հրաձգության կասկածյալը ծնունդով Թուրքիայից Գոկմեն Տանիսն է։
Նրա հայրը՝ Մեհմեդ Տանիսը, որը ապրում է Թուրքիայի կենտրոնական Կայսերի քաղաքում, Demiroren լրատվական գործակալությանը հայտնել է, թե ինքը որդու հետ 11 տարի չի խոսել։ «Եթե նա դա արել է, պետք է պատիժ կրի»,- ասել է հայրը։
Թուրքական պաշտոնական Anadolu լրատվական գործակալությունը հայտնել է, որ կասկածյալի հարազատների կարծիքով՝ նա «ընտանեկան խնդիրների» պատճառով մոտ մարդու վրա է կրակել։