Կառավարությունը սեփականաշնորհված հողատարածքները վերադարձնելու հետ կապված կոնկրետ գործընթացներ է սկսել: Այս մասին այսօր՝ մարտի 19-ին, իր ասուլիսում հայտարարեց ՀՀ վարչապետ Նիկոլ Փաշինյանը:
Հարցին, թե հնարավո՞ր է վերանայվեն տարբեր հողատարածքների սեփականաշնորհման գործընթացները, Փաշինյանն արձագանքեց. «Նախորդ տարվա ամռանը, երբ այցելեցի Մեղրու ազատ տնտեսական գոտի, արձանագրեցի, որ այդ գոտին ընդհանրապես հողատարածք չունի: Բնականաբար, առաջին իսկ հայացքից տաօրինակ փաստ էր եւ մենք այդ հարցով սկսեցինք զբաղվել: Պարզվեց, որ ձեզ հայտնի մի շարք բարձրաստիճան պաշտոնյաներ Մեղրու ազատ տնտեսական գոտու տարածքի շուրջ եղած ամբողջ հողերը սեփականաշնորհել են՝ իմանալով, որ այդ տեղ նման նախագիծ է իրականացվելու: Ընդ որում սեփականաշնորհել են ծիծաղելի գներով:
Առաջին բանը, որ մենք արեցինք, ինչի համար վաղը մեզ սոցիալական ցանցերում կքննադատեք, լուր ուղարկեցինք եւ ասացինք՝ այսպես չի կարող լինել, եկեք կամավոր վերադարձրեք այդ հողերը պետությանը: Շատ քաղաքավարի խնդրեցինք եւ նրանք մերժեցին: Շատ լավ, մենք ասացինք, որ ավելի մանրամասն կծանոթանանք այդ գործարքների հետ: Ավելի մանրամասն ծանոթացանք եւ հիմա քրեական գործ է հարուցված եւ որեւէ կասկած չկա, որ կապացուցվի, որ այդտեղ տեղի է ունեցել չարաշահում»:
Նա հիշեցրեց, որ գեներալ Մանվել Գրիգորյանի դեմ հարուցված քրգործի շրջանակներում ՀՔԾ-ն մինչեւ գործը դատարան ուղարկելը արդեն իսկ բազմաթիվ հողատարածքների կեղծ մրցույթների փաստեր էր բացահայտել եւ այդ գործերն ուղարկել է Տարածքային կառավարման նախարարություն, որպեսզի այդ կեղծ գործարքները, աճուրդները չեղյալ արվել եւ բոլոր հողերը վեարդարձվեն համայնքներին:
«Այս գործընթացը պետք է շարունակվի: Ես չեմ կարող ասել, որ բոլոր սեփականաշնորհված հողերը հետ ենք վերադարձնելու: Կարող ենք ասել, որ բոլոր այն դեպքերում, երբ կպարզվի, որ տեղի է ունեցել ապօրինություն, այդ դեպքերում այդ հողերը կվերադարձվեն պետությանը: Այո, մենք ունենք հողի խնդիր: Այսօր կան ներդրումային ծրագրեր, որոնք չեն իրականանում այն պատճառով, որ նախկին մի պաշտոնյա սեփականաշնորհել է, հիմա գնում են այդ պաշտոնյային ասում են՝ այդ հողն ուզում ենք գնել: Իմանալով, որ ներդրումային հետաքրքրություն կա, 10 անգամ ավել գին են ասում: Ասում են՝ իմ հողի գինը էս ա, ուզում ես՝ ուզի, չես ուզում՝ ուզի:
Բայց սա իսկապես լուրջ խնդիր է: Երկու օր առաջ եղա Ռանչպար համայնքում, որտեղ մարդիկ խոսում էին ավազահանքի մասին, եւ պարզվեց, որ սեփականատերերը նախկին ու ներկա բարձրաստիճան պաշտոնյաներ են: Ես հանձնարարել եմ, որ վերահսկողական ծառայությունը ստուգի՝ այդ գործարքն օրինական է, թե ոչ»,-ասաց վարչապետը:
