Եվրասիական տնտեսական միությունը (ԵՏՄ) եւ ԱՄՆ-ը խորացնում են առեւտրատնտեսական համագործակցությունը, չնայած Վաշինգտոնի պատժամիջոցների քաղաքականությանը։ Այս մասին ասել է Եվրասիական տնտեսական հանձնաժողովի ինտեգրման եւ մակրոէկոնոմիկայի կոլեգիայի անդամի օգնական Ֆյոդոր Չեռնիցինը։

«Չնայած պատժամիջոցային հռետորաբանությանը՝ մեր առեւտրատնտեսական համագործակցությունն ԱՄՆ-ի հետ անգամ աճել է»,- նրա խոսքերը մեջբերում է ՏԱՍՍ-ը։

Նրա խոսքով՝ 2015 թվականից մինչ օրս առեւտրի ծավալը ԵՏՄ-ի եւ ԱՄՆ-ի միջեւ ավելացել է մոտ 20 տոկոսով։

Չեռնիցինն ավելացրել է, որ երկու կողմերի միջեւ ապրանքաշրջանառությունը 2018-ին կազմել է 28,3 մլրդ դոլար, այն դեպքում, երբ 2015-ին 23,6 մլրդ էր։ Նշվում է նաեւ, որ ներդրումների հոսքն ավելացել է 25 տոկոսով։