Մարտի 20-ին Երեւանում քննարկում է սկսվել «Հայաստանում ատոմային ոլորտի զարգացման հեռանկարները» թեմայով, փոխանցում է NEWS.am-ի թղթակիցը: Քննարկումը կազմակերպել են «Ռոսատոմ-Արեւելյան Եվրոպա» (մտնում է «Ռոսատոմ» պետական կորպորացիայի մեջ) ընկերությունը եւ «Ատոմային էլեկտրակայանների շահագործման հայկական գիտահետազոտական ինստիտուտ» («Հայատոմ» ԳՀԻ) ՓԲԸ-ն:
Միջոցառման շրջանակում փորձագետները կքննարկեն Հայաստանում ատոմային էներգետիկայի ընթացիկ վիճակը եւ նրա զարգացումը, նոր ԱԷԿ-ի կառուցման հեռանկարները եւ մշակված միջուկային վառելիքի վերաբերյալ համաշխարհային լավագույն փորձի կիրառման հնարավորությունները:
Նիստին մասնակցում են Հայաստանի Էներգետիկ ենթակառուցվածքների եւ բնական պաշարների նախարարության, Հայաստանի կառավարությանն առընթեր Միջուկային անվտանգության պետական կոմիտեի, Հայկական ԱԷԿ-ի, Էներգետիկայի գիտահետազոտական ինստիտուտի, Հայաստանի ատոմային էներգետիկայի վետերանների միության, Հայաստանի Ազգային պոլիտեխնիկական համալսարանի, հասարակական կազմակերպությունների ներկայացուցիչներ եւ այլ ճյուղային փորձագետներ, ինչպես նաեւ գիտության գործիչներ:
