Արդեն երկարացվել են ավելի քան 2500 անուն մասնագիտական բաղադրիչների, համակարգերի եւ կառուցվածքների շահագործման ժամկետները: Մարտի 20-ին Երեւանում ընթացող «Հայաստանում ատոմային ոլորտի զարգացման հեռանկարները» թեմայով քննարկման ժամանակ ասաց Հայկական ԱԷԿ տնօրենի խորհրդական Գերա Սավիկյանը:
Նա, մասնավորապես, նշեց, որ Հայաստանի ատոմային էներգետիկայի առանցքային նախագծերից մեկը Հայկական ԱԷԿ-ի երկրորդ էներգաբլոկի թարմացումն ու արդիականացումն է: «Տուրբինային արտադրամասի հիմանական հանգույցներն արդեն արդիականացվել են, տեղադրվել է 1000 տոննայից ավելի սարքավորում»,- շեշտեց Սավիկյանը: Ընդ որում՝ նա նշեց, որ 2019 թվականին նախատեսվում է երկրորդ տուրբոգեներատորի տեղադրումը: Փորձագետը հավաստիացրեց, որ նախագծի ավարտին Հայաստանն ավելի հզոր ԱԷԿ կունենա:
Հայկական ԱԷԿ-ի տնօրենի խորհրդականը հայտարարեց, որ ԱԷԿ-ի վերանորոգման ծախսերն, ամենայն հավանականությամբ, չեն ազդի էլեկտրաէներգիայի սակագնի վրա, քանի որ այն ծախսը կվերադարձնի: «Վերանորոգումից հետո կայանի աշխատանքի արդյունավետությունը կմեծանա: Այսինքն՝ այն նույնքան վառելանյութ կսպառի, բայց ավելի շատ էլեկտրաէներգիա կարտադրի: 2020 թվականին կայանի հզորությունը 10-15 տոկոսով կաճի՝ ներկայիս 390-ից մինչեւ 420 մեգավատտ, իսկ 2021-ին՝ մինչեւ 450»,- պարզաբանեց Սավիկյանը՝ հավելելով, որ վերանորոգման աշխատանքները թույլ կտան կայանի կյանքը երկրարացնել ոչ թե մինչեւ 2026 թվականը, ինչպես նախապես էին կարծում, այլ նույնիսկ ավելի երկար: