Տուրքերի բարձրացման դեպքում փոխանակման կետերը չեն կարողանա արժանապատվորեն մրցակցել բանկերի հետ։ Այս մասին փոխանակման կետերի, դիլերների եւ գրավատների գործունեության հարցի վերաբերյալ աշխատանքային խորհրդակցությունում, որը նախաձեռնել էր Տնտեսական հարցերի մշտական հանձնաժողովը, մարտի 20-ին ասաց Հայաստանի արժութային դիլերների միության նախագահ Արամայիս Խաչատրյանը։
Նրա խոսքով՝ պետական տուրքը բանկային մասնաճյուղի համար սահմանվել է 350 հազար դրամի չափով, բայց անցյալում այն չէր վճարվում, քանի որ գլխավոր օֆիսը վճարում էր տուրք 3 միլիոն դրամի չափով, իսկ փոխանակման կետերն այդ ժամանակ վճարում էին տուրք 50 հազար դրամի չափով։
Խաչատրյանն ընդգծել է, որ իրենց հետ ոչինչ չի քննարկվել, եւ օրինագիծը նախաձեռնվել է առանց նրանց կարծիքն ու դիրքորոշումը հաշվի առնելու։
Նա նշել է, որ Երեւանի փոխանակման կետերում միջինը շրջանառության մեջ է գտնվում մոտ 10 մլն դրամ, իսկ շրջաններում շրջանառվում է մոտ 3 մլն դրամ։ «Եթե մենք այս հարցը դիտարկենք այս տեսակետից, ապա ստացվում է, որ մեր եկամուտը հասնում է 500 000 դրամի՝ հաշվի առնելով աշխատավարձերի վճարումը եւ ծախսերը։ Այս ամենը հաշվի առնելով՝ մենք պարզապես ի վիճակի չենք լինի վճարել բարձր տուրքը։ Այս դեպքում գործող 231 փոխանակման կետերի 80 տոկոսը կկանգնի փակվելու սպառնալիքի առջեւ»,- բացատրել է Հայաստանի արժութային դիլերների միության նախագահը։
Բացի այդ, նա նաեւ նշել է, որ վերջին տասը տարիներին փոխանակման կետերի եկամուտները Հայաստանում նվազել են 2,2 անգամ, ինչի մասին կարող են վկայել Կենտրոնական բանկն ու Հարկային ծառայությունը։ Պատճառն այն է, որ փոխանակման կետերը պետք է սպասարկեն միայն փոքր շահութաբեր գործարքներ։
Նշենք, որ առաջարկվող օրենսդրական փոփոխություններով վարկային կազմակերպությունները 500 հազար դրամի փոխարեն պետք է վճարեն 3 միլիոն դրամի չափով հարկ, վճարապրոցեսինգային ընկերությունները՝ 250 հազարի փոխարեն 1 մլն դրամ, բանկային բյուրոները՝ 500 հազարի փոխարեն 1 միլիոն դրամ, բանկերը՝ 3 միլիոնի փոխարեն 7 միլիոն դրամ, գրավատները՝ 100 հազարի փոխարեն 6 միլիոն դրամ, փոխանակման կետերը՝ 50 հազարի փոխարեն 3 միլիոն դրամ եւ փոխանակման դիլերները՝ 100 հազարի փոխարեն 3 միլիոն դրամ։
