NASA-ի ներկայացուցիչները պաշտոնապես հայտարարել են, որ մտադիր են ստեղծել եւ 2023թ․ Երկրի արբանյակի վրա ուղարկել առաջին ամերիկյան լուսնագնացը՝ հայտնում է ՌԻԱ Նովոստին՝ հղում կատարելով Space.com-ին։
Տիեզերքի յուրացումը եւ մարդու վերադարձը Լուսին 2016թ․ Դոնալդ Թրամփի նախագահ ընտրվելուց հետո դարձել է NASA-ի գլխավոր խնդիրներից մեկը։ Ինքը՝ նախագահը, եւ NASA-ի ապագա կառավարիչ Ջիմ Բրայդենսթինը հաճախ են խոսում Լուսնի ուղեծրում կայան կառուցելու, այնտեղ վայրէջք կատարելու եւ «մշտական ենթակառուցվածք» ստեղծելու մասին։
Այս ծրագրերի իրականացման առաջին քայլը դարձել է NASA-ի եւ առաջատար ինը տիեզերական սթարթափների ու խոշոր ընկերությունների միջեւ կնքված համաձայնագիրը, որը ստորագրվել է անցյալ տարվա նոյեմբերին։ Դրա շրջանակներում ԱՄՆ աերոտիեզերական գործակալությունը արդեն առաջիկա տարիներին իր սարքերը Լուսին ուղարկելիս կարող է օգտվել նրանց ծառայություններից։