Երեւան քաղաքի ընդհանուր իրավասության դատարանը քիչ առաջ որոշում կայացրեց ԲՀԿ-ական պատգամավոր Էդուարդ Բաբայանի գործով ապացույցների հետազոտման փուլի մի հատվածն անցկացնել դռնփակ։
Տուժող Վյաչեսլավ Հարությունովի պաշտպանը միջնորդեց ներքին դիտման եւ հեռախոսային գաղտնալսումների ձայնագրությունները հետազոտել դռնփակ, քանի որ հնչել են ոչ բարեհունչ արտահայտություններ եւ հայհոյանքներ։
«Տուժողը խիստ անձնական խոսակցություն է ունեցել կնոջ եւ որդու հետ, հնչել են հայհոյանքներ։ Վյաչեսլավ Հարությունովն իր կնոջ ու որդու հետ խոսել է անձնականից, իր հիվանդությունից։ Հետեւաբար, սրանք պետք է հետազոտել դռնփակ»,- հայտարարեց պաշտպանը։
Չնայած մեղադրանքի կողմն առարկեց միջնորդությանը, դատարանը որոշեց բավարարել այն։ Ապացույցների հետազոտումից հետո նիստը հետաձգվեց եւ նշանակվեց մարտի 29-ին։
Նշենք, որ այսօրվա նիստում ամբաստանյալը հայտարարեց, որ իրեն մեղավոր չի ճանաչում։ Գործով տուժող Վյաչեսլավ Հարությունովն էլ հայտարարեց, որ իրեն տուժող չի համարում։
Համաձայն մեղադրական եզրակացության ՝ Էդուարդ Բաբայանը 2018թ․ հուլիս 2-ին «Օլիմպավան» մարզական համալիրի հանդիպումների դահլիճում հարվածներ է հասցրել Վյաչեսլավ Հարությունովին՝ առողջությանը դիտավորությամբ պատճառելով ծանր վնաս։ Գործը մակագրվել է Երևանի ընդհանուր իրավասության դատարանի դատավոր Մեսրոպ Մակյանին։
Հիշեցնենք, որ Բաբայանը 2018թ. օգոստոսի 21–ին 20 մլն դրամ գրավի դիմաց ազատ էր արձակվել կալանքից, իսկ 2018թ. դեկտեմբերի 9–ին կայացած ԱԺ արտահերթ ընտրություններում ընտրվել պատգամավոր։