ՀՀ վարչապետ Նիկոլ Փաշինյանի այցը Եվրոպական միություն նպատակային չէր, քանի որ 1.5 ամիս հետո ԵՄ ամբողջ կազմը փոխվելու է։ Այս մասին այսօր՝ մարտի 21-ին, լրագրողների հետ հանդիպմանն ասաց քաղաքական գործիչ Գուրգեն Եղիազարյանը։
«ԵՄ գնալն իմաստ չուներ, օրինակ, ինչո՞ւ գնաց հանդիպեց մեկի հետ, որը 1.5 ամիս հետո կապ չի ունենալու, գնալու է թոշակի»,–նշեց նա։
Գուրգեն Եղիազարյանը կարծիք հայտնեց, որ Եվրամիությունում երեք խնդիր նկատի ունեին, երբ ասում էին, որ Հայաստանին գումար կտան, եթե որոշ խնդիրներ լուծվեն։
«Յունկերը ասաց, որ, այո, 179 մլն եվրոյի օգնություն ցույց կտանք, եթե ՀՀ–ում որոշակի խնդիրներ լուծվեն։ Յունկերը նկատի ուներ երեք խնդիր՝ փոքրամասնություններին, նրանց համար նոր օրենք պետք է ընդունի ՀՀ–ն, հաջորդը Արցախն էր, 3-րդ խնդիրը՝ ՀՀ–ն պետք է խզի ՌԴ–ի հետ հարաբերությունները»,– ասաց նա։
Հիշեցնենք, որ մարտի 5-ին Նիկոլ Փաշինյանը աշխատանքային այցով մեկնել էր Բրյուսել։
