News
Լրահոս
News
Երեքշաբթի
Մարտ 19
Տեսնել լրահոսը

Հայաստանում Ինտերպոլի ԱԿԲ պետ Արա Ֆիդանյանի հարցազրույցը NEWS.am լրատվական գործակալությանը:

Կխնդրեի պատմել Կազմակերպության մասին, այն ինչո՞վ եւ ինչպե՞ս է զբաղվում:

Ինտերպոլը միջազգային խոշորագույն կազմակերպություններից մեկն է եւ ոստիկանական խոշորագույն կազմակերպությունը: Այս պահին Կազմակերպությանն անդամակցում է 194 երկիր: Ինտերպոլի դերը տարեցտարի մեծանում է: Սա առաջին հերթին պայմանավորված է այն հանգամանքով, որ նույնիսկ ոչ հեռու անցյալում սովորական ներպետական հանցագործությունների դեմ պայքարն իրականացվում էր մեկ պետության ուժերով: Այսօրվա դրությամբ՝ այդ թվացյալ սովորական հանցագործությունները միջազգային բնույթ են կրում: Շատ հանցագործություններ, թե՛ նույնիսկ «ամենահասարակ», ինչպես խադախությունը, թե՛ առավել եւս թմրանյութերի, զենքի ապօրինի շրջանառության, մարդկանց թրաֆիքինգի, միջազգային բնույթ են կրում, եւ պետություններն ի վիճակի չեն միայնակ պայքարելու: Եվ այստեղ առաջին պլան է գալիս Ինտերպոլը, որը համակարգում է Կազմակերպության անդամ երկրների համագործակցությունը:

Հայաստանում Ինտերպոլի ԱԿԲ-ն Կազմակերպության աշխատանքում կարեւոր տեղ է զբաղեցնում, մասնավորապես՝ չափազանց օպերատիվորեն է արձագանքում բոլոր հարցումներին եւ համապատասխան միջոցներ ձեռնարկում, միեւնույն ժամանակ արդյունավետորեն համագործակցում ենք ազգային իրավապահ մարմինների հետ: Արդյունքում՝ գրանցվում են բավականին բարձր ցուցանիշներ, ինչի հետ կապված մեծ հեղինակություն ունենք մնացյալ ԱԿԲ-ների շրջանում եւ Ինտերպոլի Գլխավոր քարտուղարությունում: Սրանով է պայմանավորված նաեւ այն հանգամանքը, որ Հայաստանում Ինտերպոլի ԱԿԲ-ն Ինտերպոլի Եվրոպական կոմիտեի անդամ է, ինչն այնպիսի երկրի համար, ինչպիսին Հայաստանն է, բավականին լուրջ ձեռքբերում է:

Ինչ վերաբերում է աշխատանքային գործունեությանը եւ դրա ծավալներին, բնականաբար աշխատանքի ծավալների մեծացմանը զուգահեռ աճում է նաեւ փաստաթղթաշրջանառությունը: Օրինակ՝ 2014 թվականին այն կազմել է 32 794 տեղեկատվական միավոր: 2016-ին՝ 48 586, իսկ 2018-ին՝ 92 183: Թվերն ինքնին խոսուն են:

Հայաստանի նախաձեռնությամբ քանի՞ մարդ է հետախուզվում Ինտերպոլի գծով:

Ինտերպոլի առաջնային խնդիրներից մեկը հետախուզման մեջ եղող անձանց հայտնաբերումն է: Այս պահին ամբողջ աշխարհում միջազգային հետախուզման մեջ է ընդհանուր 161 679 անձ, որոնցից 380-ը Հայաստանի իրավապահ մարմինների նախաձեռնությամբ: Կազմակերպության այլ անդամ երկրներից գործընկերների հետ սերտ համագործակցությամբ ԱԿԲ-ն միջոցառումներ է ձեռնարկում՝ ուղղված անձանց հայտնաբերմանը, որոնց նկատմամբ հետախուզում է հայտարարվել Հայաստանի իրավապահ մարմինների նախաձեռնությամբ, որոնց շրջանակում անցկացվում են հետախուզման լայնամասշտաբ միջոցառումներ: 2017-ից մինչեւ 2018 թվականը Ինտերպոլի անդամ երկրների տարածքում հայտնաբերվել է 355 անձ, որոնք հետախուզվում էին Հայաստանի իրավապահ մարմինների նախաձեռնությամբ՝ ծանր, առանձնապես ծանր եւ հասարական հնչեղություն ունեցող հանցագործությունների կատարման մեղադրանքով, որոնցից 262-ը ձերբակալվել է, իսկ 39-ը արտահանձնվել է:

Մեզ համար առաջնային ուղղություն է նաեւ Հայաստանի տարածքում այն անձանց հետախուզումը, որոնց նկատմամբ հետախուզում է հայտարարվել այլ երկրների նախաձեռնությամբ: Հայաստանի ոստիկանության իրավասու ստորաբաժանումների հետ սերտ համագործակցությամբ 2017-2018 թվականներին Հայաստանի տարածքում հայտնաբերվել է Ինտերպոլի գծով հետախուզվող 136 անձ, որոնցից 59-ը ձերբակալվել է, 9-ը արտահանձնվել: Մնացյալ անձանց նկատմամբ արտահանձնման ընթացակարգը կա՛մ շարունակվում է, կա՛մ, արտահանձնումը մերժվել է՝ Հայաստանի քաղաքացիությամբ պայմանավորված:

Մեր կողմից նաեւ հատուկ միջոցառումներ են անցկացվում Հայաստանի քաղաքացիների եւ ենթադրաբար հայազգի անձանց վերաբերյալ, որոնք հետախուզվում են այլ պետությունների կողմից: Այս պահին Հայաստանի 549 քաղաքացի կամ հայազգի անձ միջազգային հետախուզման մեջ է, 118-ը հետախուզվում է ազգային մակարդակով:

Ինտերպոլի գործունեությունը չի սահմանափակվում միայն անձանց հետախուզմամբ, սա ընդամենը մեկն է շատ այլ ուղղությունների թվում, որում աշխատանքի արդյունքներն առավել ակնհայտ են: Համատեղ աշխատանքն անցկացվում է թփմրանյութերի, զենքի եւ ռազմամթերքի ապօրինի շրջանառության, մարդկանց թրաֆիքինգի, մշակութային արժեքների ապօրինի շրջանառության, ահաբեկչության, կիբեռհանցագործությունների կանխման, կազմակերպված հանցավորության, տնտեսական հանցագործությունների դեմ պայքարի նպատակներով: Սահմանափակումներ չկան՝ բացառությամբ Կազմակերպության կանոնադրության 3-րդ հոդվածով նախատեսվածից, որն արգելում է Ինտերպոլի ուղիների օգտագործումը քաղաքական, կրոնական, ռասայական եւ զինվորական բնույթի գործերով:

Ադրբեջանը ժամանակ առ ժամանակ փորձեր է ձեռնարկում Ինտերպոլի ուղիները քաղաքական նպատակներով օգտագործելու համար: Վառ օրինակներից մեկը բլոգեր Ալեքսանդր Լապշինի հետ կատարվածն էր: Ինչպե՞ս է ԱԿԲ-ն հակազդում համանման փորձերին:

Ադրբեջանն իսկապես փորձում է Ինտերպոլի ուղիներն օգտագործել որոշակի քաղաքական խնդիրների լուծման համար, սակայն Ինտերպոլը լուրջ գործիքակազմ ունի նման կարգի մոտեցումների կանխման համար, կազմակերպության կառուցվածքում նաեւ գործում է հրաշալի կազմակերպված անկախ մարմին, որն Ինտերպոլի ուղիներով ստացվող բոլոր հարցումների իրավաբանական ուսումնասիրություն է կատարում: Մինչ օրս Ադրբեջանին չի հաջողվել Ինտերպոլի ուղիներն ինչ-որ կերպ օգտագործել, քանի որ նրանց բոլոր փորձերը ժամանակին կանխվել են: Մենք մեր կողմից նույնպես որոշակի քայլեր ենք ձեռնարկում: Կան անձանց հատուկ ցուցակներ, որոնց նկատմամբ Ադրբեջանը ենթադրաբար կարող է փորձել Ինտերպոլի ուղիներով հետախուզում հայտարարել՝ ելնելով իր քաղաքական նպատակներից, ինչի հետ կապված մենք պարբերաբար մոնիթորինգ ենք անցկացնում: Ինչ վերաբերում է Լապշինին, ապա նրա դեպքում Ադրբեջանը փորձեց օգտվել Կազմակերպության ուղիներից, սակայն դա տեղի չունեցավ: Նրա նկատմամբ հետախուզում հայտարարվեց ԱՊՀ գծով, եւ սա միանգամայն այլ քաղաքական բնույթ ուներ:

Ինչպե՞ս եք գնահատում Ինտերպոլի շրջանակում համագործակցությունը Թուրքիայի, Ադրբեջանի հետ

Թուրքիայի հետ համագործակցությունը բավականին լավ է զարգանում: Դա մեր շահերից է բխում, որովհետեւ, ցավոք, Թուրքիայում ոչ միայն մեծաքանակ հայկական համայնք է բնակվում, այլեւ մեծ թվով ՀՀ քաղաքացիներ: Թվեր չեմ նշի, բայց վստահեցնում եմ, որ չկա այնպիսի շաբաթ, որ Թուրքիայից ՀՀ քաղաքացիների կողմից կատարված հանցագործությունների վերաբերյալ մի քանի հարցում չստանանք: Թուրքական կողմը բավականին պատրաստակամ է համագործակցության համար ընդհուպ մինչեւ այն, որ Թուրքիայի հետ դիվանագիտական հարաբերություններ չունենալով՝ մենք անմիջականորեն Ինտերպոլի ուղիներով անձանց արտահանձնում ենք իրականացրել, ինչի կապակցությամբ կարելի է արձանագրել, որ Թուրքիայի հետ Ինտերպոլի ուղիներով համագործակցությունը առանց խնդիրների է իրականացվում:

Ինչ վերաբերում է Ադրբեջանին, ապա այստեղ պատկերը բոլորովին այլ է, մենք փորձել ենք համագործակցության եզրեր գտնել, սակայն ապարդյուն, եւ դրանից մենք ոչ մի կերպ չենք տուժել: Միեւնույն է՝ մեր ընկալմամբ լիարժեք համագործակցության անհնար կլիներ հասնել, եւ նման մոտեցումը համարժեք պատասխանի է արժանանում:

Միջազգային ահաբեկչությունը գնալով ավելի մեծ թափ է հավաքում: ԱԿԲ-ն իր ներդրումն ունի՞ այդ երեւույթի դեմ պայքարում:

Սա ամբողջ համաշխարհային հանրության կարեւորագույն խնդիրներից է: ԱԿԲ-ի տրամադրության տակ են Գլխավոր քարտուղարության տվյալները եւ հակազդեցության նրանց հնարավորությունները, իսկ դրանք բավականին մեծ են: Կա տվյալների լուրջ բազա, եւ այն օգտագործվում է: Սակայն ահաբեկչությունը երեւույթ է, որն օր օրի փոխում է իր պատկերը, եւ ասել, որ մենք ապահովագրված ենք, չի կարելի: Անհրաժեշտ են բոլոր հնարավոր եւ անհնար քայլերը: Մեկ քայլ առաջ լինել:

Նոր Զելանդիայում վերջերս կատարված ահաբեկչության եւ զենքի վրա ի թիվս այլ գրությունների՝ հայերենով գրության կապակցությամբ երկրի իշխանությունները դիմե՞լ են Հայաստանին:

Գրությունները մեզ համար էլ են ուսումնասիրման առարկա: Դեռ պաշտոնական դիմում չի եղել, սակայն Նոր Զելանդիայի գործընկերներից նախնական ազդանշան ստացել ենք: Բնականաբար, դեռ վաղ է ինչ-որ բան հաստատելը, փորձաքննություն է պետք: Սակայն հնարավոր համագործակցության մասին ազդանշան եղել է, եւ կոնկրետ հարցերի ծագման դեպքում մենք ձեռնամուխ կլինենք ուսումնասիրմանը:

Արդյոք անցյալ տարի ԱԿԲ-ի կողմից առանձնապես հաջողված գործողություններ կատարվե՞լ են

Շատ բան մենք չենք հրապարակում լայն հասարակության համար, չենք զբաղվում սեփական PR-ով եւ դրա կարիքը չունենք: Կարեւոր եւ հետաքրքիր աշխատանք է կատարվում, բայց հաճախ դա տեսանելի չէ, եւ մենք չենք պատրաստվում փոխել մեր մոտեցումները: Բայց առանձնապես հետաքրքիր եւ կարեւոր գործեր, իհարկե, եղել են: Դրանց թվում է Թուրքիայի քաղաքացի Օքսուզի հայտնաբերումը: Մենք կարողացանք կանխել այդ կարգի անձի գործունեությունը: Նա արդեն արտահանձնվել է նրա նկատմամբ հետախուզում հայտարարած ԱՄՆ-ի իշխանություններին՝ քրեական հետապնդման համար:

Թմրամիջոցների ապօրինի շրջանառության կանխարգելման նպատակով շատ լուրջ աշխատանք է կատարվում ազգային իրավապահ մարմինների եւ օտարերկրյա գործընկերների համագործակցությամբ: Մի քանի ամիս Լեհաստանի տարածքում անցկացվել էր շատ հետաքրքիր ոստիկանական գործողություն, փորձ էր արվել թմրամիջոցների տարանցման համար միջազգային ուղի ստեղծել:

Մյուս կարեւոր ուղղությունը մշակութային արժեքների որոնումն է: Արդեն մի քանի տարի աշխատում ենք, փորձում ենք վերադարձնել Այվազովսկու նկարը: Կտավը գողացվել է 1992 թվականին Հայաստանում մասնավոր անձից եւ 25 տարի անց մեր կողմից հայտնաբերվել Լոնդոնի աճուրդում: Հուսով ենք, որ մեր աշխատանքը հաջողությամբ կպսակվի, եւ նկարը կվերադարձվի Հայաստան:

!
Այս նյութը հասանելի է նաև   Русский
Տպել
Կարդացեք նաև
Ամբողջը
Եղբայրներով ծեծել են տաքսու վարորդին, վնասել մեքենան. Նրանցից մեկը դանակահարել է տաքսու կին ուղեւորին
Կենցաղային հարցերի շուրջ վիճաբանությունն ավարտվել էր դանակահարությամբ. կան ձերբակալվածներ...
Գորիսում 3 անձի նկատմամբ մահափորձի վարույթով հետախուզվող տղամարդը հայտնաբերվել և կալանավորվել է. ՔԿ
ՀՀ քննչական կոմիտեի Սյունիքի մարզային քննչական վարչության Գորիսի քննչական…
Բերման ենթարկված հետախուզվողի մոտ ծալովի դանակ է հայտնաբերվել
ՆԳՆ ոստիկանության ՊԾ գնդի 4-րդ գումարտակի ծառայողները...
Աբովյանում երկու կողմից փակել են մեքենայի ճանապարհը, խմբով հարձակվել ու ծեծել վարորդին, կրակել նրա ուղղությամբ. ՔԿ
ՀՀ քննչական կոմիտեի Կոտայքի մարզային քննչական վարչությունում շարունակվում...
Քանաքեռավանի գազալցակայանում պայթյունի հանգամանքները պարզվում են քրվարույթի շրջանակում. ՔԿ-ն մանրամասնում է
2024 թվականի մարտի 16-ին՝ ժամը 19․10-ի սահմաններում, Կոտայքի մարզի Նոր...
Ֆրանսիայի Ինտերպոլի կողմից հետախուզվող Արտուշը հայտնաբերվել է «Զվարթնոց»-ում
ՆԳՆ ոստիկանության «Զվարթնոց» օդանավակայանի գծային բաժնի քրեական...
Ամենաշատ