ԳԴՀ կանցլեր Անգելա Մերկելը նախազգուշացրել է, որ Բեռլինը բախվում է եվրոպական պաշտպանական արդյունաբերության համատեղ նախագծերում անհուսալի գործընկեր դառնալու վտանգի հետ՝ հայտնում է Reuters-ը։
Մերկելի մեկնաբանությունները հնչել են ԳԴՀ-ի հանդեպ Ֆրանսիայի եւ Բրիտանիայի լարվածության ֆոնին՝ կապված Սաուդյան Արաբիային զենք վաճառելու Բեռլինի արգելքի հետ։ Փարիզն ու Լոնդոնը հաստատում են, որ դա խանգարում է գերմանական ընկերությունների հետ ստեղծած սարքավորումների իրենց վաճառքներին։
Մերկելի խոսքերով, համատեղ եվրոպական նախագծերը «գործընկերների միջեւ հուսալիություն» են պահանջում։ Նա նշել է, որ երկրները կարող են տարբեր տեսակետներ ունենալ, եւ Գերմանիային անհրաժեշտ է քննարկել այդ հարցը, «այլապես մենք կհամարվենք բարոյապես մեծամիտ եւ անընդունակ փոխզիջման գնալու»։
Հոկտեմբերին Գերմանիան դադարեցրել էր Սաուդյան Արաբիային զենքի մատակարարումը, ներառյալ այն զենքի, որի մատակարարման մասին դրական որոշումն արդեն ընդունված էր։ Որոշումը կապված էր լրագրող Ջամալ Խաշոգջիի սպանության հետ։
Գերմանիան չորրորդն է Սաուդյան Արաբիա զենք արտահանողների շարքում։ Այդ հարցում վաճառքի ծավալով նրան գերազանցում են Լոնդոնը եւ Փարիզը, իսկ առաջին տեղում Միացյալ Նահանգներն են։