Կան հարցեր, որոնք առաջացնում են մեր անհանգստությունը։ Այս մասին Պետական եկամուտների կոմիտեի նախագահ Դավիթ Անանյանի հետ «Բարգավաճ Հայաստան» կուսակցության պատգամավորների փակ հանդիպումից հետո հայտարարել է Տարածաշրջանային եւ եվրասիական ինտեգրման մշտական խորհրդարանական հանձնաժողովի նախագահ Միքայել Մելքումյանը։ Նրա խոսքերով, արդեն 8 ամիս է, ինչ կառավարությունը չի կարողանում խորհրդարանի քննարկմանը ներկայացնել նոր Հարկային օրենսգիրքը։ «Նրանք ուզում են փոխել այն ամենը, ինչին կպչում են։ Հետո առաջանում է դժգոհություն, եւ նրանք հրաժարվում են իրենց սկզբնական գաղափարից։ Ահա փաստաբանները սկսեցին բողոքել, նրանք զիջեցին։ Այժմ էլ ծագել են գազավորված ըմպելիքների հետ կապված բողոքներ։ Նրանք նաեւ այդ նախաձեռնությունից կհրաժարվեն։ Սակայն այդ սկզբունքով Հարկային օրենսգիրքը չի քննարկվում»,-ընդգծել է պատգամավորը։

Միաժամանակ, նա նշել է, որ քաղաքացիները հաճախ իրենք են ստեղծում եւ ապահովում իրենց աշխատատեղերով, առանց որեւէ օգնության կամ կողքից պետության մասնակցության, եւ այդպիսի պայմաններում պետական տուրքերի էական բարձրացումը կարող է լրջորեն հարվածել փոքր եւ միջին բիզնեսին՝ հանգեցնելով շատ կազմակերպությունների փակմանը։ «Եթե որեւէ ընկերություն կամ կազմակերպություն կոչվում է «ֆինանսական ընկերություն կամ կազմակերպություն», դա դեռեւս չի նշանակում, որ նրանք շրջանառության մեջ միլիարդավոր դրամներ ունեն։ Դա միայն անվանումն է այդպես։ Մեր տնտեսությունը կոչվում է շուկայական, սակայն մենք չունենք դասական շուկայական տնտեսություն»,- պարզաբանել է Մելքումյանը։