Hyundai ընկերությունը ներկայացրել է Tucson քրոսովերի նոր տարբերակը, որը N Line սպորտային հավաքածուի մի մասն է: Ավտոմեքենայի համաշխարհային վաճառքը սկսվելու է ընթացիկ տարվա մայիսից: Նորույթի գինն առայժմ գաղտնի է պահվում, փոխանցում է Autonews-ը:
Hyundai Tucson N Line-ը ստանդարտ մոդելից տարբերվում է ռադիատորի քրոմապատ վանդակաճաղով, լուսադիոդային ցերեկային ընթացքային լույսերի հատուկ բլոկով, ինչպես նաեւ 19-դյույմանի սեւ անվասկավառակներով: Սրահի ձեւավորման մեջ կօգտագործվի կաշի կոնտրաստային կարմիր դարձածալով: Հաճախորդներին կառաջարկեն համայնապատկերային տանիք եւ 9 բարձրախոսներով Krell աուդիոհամակարգ:
Քրոսովերը կունենա 2,0-լիտրանոց դիզելային շարժիչ, որը կգործի ըստ «փափուկ հիբրիդ» տեխնոլոգիայի: Ուժային սարքի հզորությունը կազմում է 185 ձիաուժ: Հասանելի է նաեւ հիբրիդային մոդիֆիկացիան՝ 1,6-լիտրանոց դիզելային ագրեգատով: Այս դեպքում քրոսովերի հզորությունը կկազմի 136 ձիաուժ:
