Հայաստանը բոլոր հնարավորություններն ունի օրգանական արտադրանքի եվրոպական շուկայում արժանի տեղ զբաղեցնելու համար: Մարտի 22-ին Ձորաղբյուրում (Կոտայքի մարզ) Ուսումնական կանաչ կենտրոնի բացման միջոցառմանը, որը ֆինանսավորվել է ԵՄ-ի եւ Ավստրիայի զարգացման գործակալության կողմից, ասաց գյուղատնտեսության փոխնախարար Գառնիկ Պետրոսյանը:
Նրա խոսքով՝ չնայած, որ Հայաստանը դեռեւս չի կարող լուրջ ազդեցություն ունենալ համաշխարհային եւ մասնավորապես եվրոպական շուկայում, երկիրը օրգանական արտադրանքի զարգացման ներուժ ունի:
«Այդ նպատակների իրականացման համար ոչ միայն գիտելիքներ են պետք, այլեւ պատասխանատու մարդիկ: Հուսով ենք, որ ԵՄ-ն կշարունակի այդ հարցում Հայաստանին ֆինանսական եւ տեխնիկական աջակցություն ցուցաբերել», - նշեց փոխնախարարը:
ՀՀ կրթության եւ գիտության նախարարության Նախնական եւ միջին մասնագիտական կրթության վարչության պետ Արտակ Ագբալյանն իր հերթին ընդգծեց, որ «Աաջակցություն օրգանական գյուղատնտեսության» ծրագրի շնորհիվ մոտ 200 հայ ուսանողներ հնարավորություն են ստացել վերապատրաստում անցնել եւ գիտելիքներ ձեռք բերել օրգանական գյուղատնտեսության ոլորտում:
«Գյուղատնտեսության ոլորտում նոր կրթական ծրագրերի ներդրման կարեւորությունը բացատրվում է Հայաստանի տնտեսության մեջ ոլորտի բացառիկ դերով», - նշեց նա: