Հայաստանի ջուրը որակով է եւ համեղ, ավելին՝ այն այս պահին բավականացնում է երկրի բոլոր պահանջների բավարարման համար: Սակայն ջրի փոխադրումը սխալ է կազմակերպվում, ինչի հետեւանքով մեծ կորուստներ են լինում, պնդում է ջրի խնդիրների փորձագետ Քնարիկ Հովհաննիսյանը:
Պաշտոնական տվյալների համաձայն՝ երկրում կորուստները կազմում են սպառվող ջրի ընդհանուր ծավալի 70-75 տոկոսը, հիշեցրեց փորձագետը: Նման կորուստներից խուսափելու համար անհրաժեշտ է ջրատար համակարգն ամբողջությամբ վերանորոգել: Իհարկե, դա մեծ ծախսեր կպահանջի, բայց բացառված չէ, որ այս ծախսերը միանգամայն արդարացված կլինեն՝ ջրի կորուստները նվազագույնի կհասցվեն, եւ ավելի շատ ջուր կօգտագործվի ըստ նշանակության:
Փորձագետի խոսքով՝ հիմնական դժվարությունն այն է, որ ջրատար խողովակների վերանորոգումը մեծ ներդրուներ է պահանջում հենց այսօր, իսկ այդ ներդրումների արդյունքները տեսանելի կլինեն միայն մեկ տարի հետո: Այդուհանդերձ, փորձագետի կարծիքով՝ վաղ թե ուշ դա ստիպված կլինեն անել:
Երկրում ջրի հետ կապված վիճակը բարելավելու համար փորձագետը նաեւ խորհուրդ է տալիս ավելի շատ ջրամբարներ կառուցել, ընդ որում՝ որակյալ, որպեսզի ջրի անցանկալի արտահոսք տեղի չունենա: Իհարկե, սա նույնպես կապված է լուրջ ծախսերի հետ, սակայն նման ջրամբարները կօգնեն խուսափել երաշտի ժամանակ ոռոգման հետ կապված խնդիրներից:
Խոսելով Հայաստանում ջրի որակի մասին՝ փորձագետը նշեց, որ այն այնքան լավն է, որ խմելու համար հատուկ մշակման կարիք չունի. այն միայն քլորացնում են ջրի միջոցով փոխանցվող մանրէների վարակներից պաշտպանվելու համար:
Փորաձագետի խոսքով՝ եթե ջրի մեկ լիտրում 0,3 մգ քլոր է պարունակվում, այն կարելի է խմել առանց առողջության վնաս պատճառելու: Քլորի ավելի մեծ քանակությունն, իհարկե, ցանկալի չէ: