Ընդհանուր առմամբ 2019 թվականի Երեւանի բյուջեն անդեմ է այն առումով, որ զարգացման տեսլական, ես միեւնույն է, չեմ տեսնում: Այս մասին այսօր՝ մարտի 22-ին, Երեւանի ավագանու արտահերթ նիստում հայտարարեց «Լույս» խմբակցության ղեկավար Դավիթ Խաժակյանը:
«Ավանդույթ կա բնութագրելու բյուջեն: Նախորդ տարվա բյուջեն, դեռ նախորդ իշխանության ժամանակ քննարկելիս, ես ասացի, որ գոյատեւման բյուջե է՝ նախատեսված ընթացի ծախսերն այս կամ այն կերպ հասցնելու համար: Այս բյուջեով ես տեսնում եմ հատվածական լուծումներ, փորձեր ինչ-որ բաներ անելու, բայց կարծում եմ, որ տարվա կտրվածքով, երբ կամփոփենք 2019 թվականը, այս բյուջեով չենք կարողանա էական բաներ արձանագրել.,-ասաց նաԼ
Անդրադառնալով հայտարարություններին, են քաղաքի 2019-ի բյուջեն ավելացել է 10 մլրդ դրամով, Խաժակյանը նկատեց. «Բարեկամական խորհուրդ կցանկանայի տալ իմ գործընկերներին: Հիմա սոցիալական ցանցերով տարածվում է, որ բյուջեն 10 մլրդ դրամով ավելացվում է: Բայց այդ ավելացումը պայմանավորված է նախորդ տարի չկատարված ծախսերով: Այսինքն նախորդ տարի չասֆալտապատված փողոցը լավագույն դեպքում այս տարի ենք ասֆալտապատելու, դրանից ընդհանուր վիճակը պահպանվելու է, չի ավելանալու:
Դուք ձեր այդ հայտարարություններով անընդհատ մեծ ակնկալիքներ եք առաջացնում մարդկանց մոտ, որը լավ է կարճաժամկետում, բայց վատ է երկարաժամկետում ձեզ համար եւ հանրության համար: Ծավալների առումով էական փոփոխություններ չկան:
Գնումների ծավալը հայտարարված է, գիտենք որքան ասֆալտապատում է իրականացվելու, ինչքան վերելակ է վերանորոգվելու: Մեծ եւ լուրջ փոփոխություններ այս բյուջեով հնարավոր չէ իրականացնել: Հնարավոր են հատվածային լուծումները, բայց մեծ փոփոխություններ չեն նախատեսվում»: