Հուսով եմ, որ Գյուղատնտեսության նախարարությունը Հայաստանի տնտեսության մեջ իր կարեւոր դերը կունենա: Այս մասին NEWS.am-ի հետ զրույցում ասաց գյուղատնտեսության փոխնախարար Գառնիկ Պետրոսյանը:
Փոխնախարարի խոսքով՝ անհրաժեշտ է սպասել Կառավարության կառուցվածքի բարեփոխման հարցով քննարկումների ավարտին, որից հետո հնարավոր կլինի ծանոթանալ դրանց արդյունքներին: «Մենք, մեր հերթին, ծանոթանում ենք հիմնավորումներին, լսում բոլոր «կողմ» եւ «դեմ» կարծիքները: Հույս ունեմ, որ արդյունքում ճիշտ որոշում կընդունվի, եւ Գյուղատնտեսության նախարարությունը իր կարեւոր դերը կունենա տնտեսության եւ ոլորտի զարգացման մեջ»,- նշեց Գառնիկ Պետրոսյանը:
Հիշեցնենք, որ Կառավարությունը պետական ապարատի օպտիմալացման շրջանակում որոշել է Գյուղատնտեսության նախարարությունը միավորել Տնտեսական զարգացման եւ ներդրումների նախարարությանը: Համապատասխան օրինագիծը խորհրդարանը դեռեւս չի քննարկել: