Կալիֆոռնիական կատվառյուծներին սպառնում է ոչնչացման վտանգը՝ ասում են ամերիկյան գիտնականները։ Կալիֆոռնիայում ապրող գիշատիչ կատուները կոչնչանան առաջիկա 50 տարիներին, եթե մարդիկ նրանց պահպանման միջոցներ չձեռնարկեն՝ հայտնում է Planet-today-ը։
Խոսքը Puma concolor-ի մասին է, որը կատվազգիների ընտանիքի բավական խոշոր ներկայացուցիչ է եւ տարածված է Ամերիկայի երկու մասերում։
Կատվառյուծները հիմնականում եղջերու են որսում, այդ պատճառով նրանց բնակության տարածքները համընկնում են կճղակավորների բնակության տարածքների հետ։ Սակայն կատվառյուծների թիվը վայրի բնության մեջ անընդհատ նվազում է։
Կատվառյուծների անհետացմանը նպաստում են անտառներով անցնող մայրուղիների կառուցումը, հրդեհները, ֆերմերները, որոնք նրանց սպանում են իրենց անասուններին պաշտպանելու համար եւ այլ գործոններ։
Եթե այս խնդիրների գոնե մի մասը չլուծվի, ապա կատվառյուծները շատ շուտով ընդհանրապես կվերանան բնությունից։