Նոր հարկային քաղաքականությունը ռեստորանային ոլորտում գնաճի չի հանգեցնի: Մարտի 23-ին լրագրողների հետ զրույցում այս մասին ասաց «Երեմյան Փրոջեքթ»-ի գլխավոր տնօրեն Դավիթ Երեմյանը:
Հիշեցնենք, որ 2018 թվականի հուլիսի 1-ից հանրային սնունդի օբյեկտներում քառակուսի մետրից գանձվող հարկը փոխարինվել էր 6 տոկոս շրջանառության հարկով, ինչը հարուցել էր ռեստորատորների դժգոհությունը եւ որոշ ռեստորանների հարկադրել գները բարձրացնել: Ենթադրվում էր, որ ընթացիկ տարվա հունվարի 1-ից շրջանառության հարկերը 8 տոկոսով բարձրանալու են, իսկ 2020 թվականից՝ մինչեւ 10 տոկոսով, ինչը, մասնագետների գնահատմամբ, պետք է անխուսափելիորեն բերի գների հետագա աճի:
Սակայն փետրվարին, կառավարության եւ ռեստորանային ոլորտի ներկայացուցիչների բանակցությունների արդյունքում համաձայնության եկան մինչեւ 2022 թվականը զերծ մնալ հարկերի հետագա բարձրացումից: Մինչեւ նշված ժամկետը կգործի շրջանառության 6 տոկոս հարկը՝ փաստաթղթավորման ծախսերից 3 տոկոս հարկային դուրսգրման հնարավորությամբ (սակայն շրջանառությունից ոչ պակաս 4 տոկոս):
«Այս տարբերակը ընդունելի է ինչպես պետության, այնպես էլ ռեստորատորների համար: Սա ռեստորանային ոլորտում գնաճի չի հանգեցնի»,- նշեց Երեմյանը: