ԱՊՀ Միջխորհրդարանական վեհաժողովի տնտեսության եւ ֆինանսների մշտական հանձնաժողովի նիստերի շրջանակում մշակվող օրենքները կարող են կողմնորոշիչ ծառայել անդամ պետությունների համար։ Այս մասին մարտի 25-ին, ԱՊՀ ՄԽՎ հանձնաժողովի նիստի արդյունքների վերաբերյալ լրագրողների հետ հանդիպմանն ասել է խորհրդարանի տարածքային կառավարման, տեղական ինքնակառավարման, գյուղատնտեսության եւ բնության պահպանության մշտական հանձնաժողովի նախագահ, «Իմ քայլը» խմբակցության պատգամավոր Վարազդատ Կարապետյանը։
Նրա խոսքով՝ նիստն սկսվել է ԱՊՀ ՄԽՎ տնտեսության եւ ֆինանսների հանձնաժողովի նախագահի ընտրությամբ, որի պաշտոնում միաձայն ընտրվել է Կարապետյանը։ «Հանձնաժողովի նպատակը մոդելային օրենքների մշակումն է։ Դրանք կարող են կողմնորոշիչ ծառայել անդամ պետությունների համար իրենց օրենսդիր մարմիններում նման օրենքներ ընդունելու գործում։ Հանձնաժողովի անդամները հավանություն են տվել «Գնագոյացման մասին» մոդելային օրենքի նախագծին։ Քննարկվել են «Հարկային վարչարարության» մասին օրենքի նախագծերը»,- նշել է պատգամավորը։
Վարազդատ Կարապետյանը տեղեկացրել է, որ նիստի ընթացքում դիտարկվել են նաեւ «Ինժեներային գործի» մասին եւ «Ինժինիրինգային գործունեության եւ ինժինիրինգի մասին» մոդելային օրենքները, որոնց ուղղությամբ աշխատանքը դեռ շարունակվում է, բացի այդ, ներկայացվել են հաշվետվություններ 2018 թվականին արված աշխատանքի մասին։ «Ապրիլի 19-ին տեղի կունենա ԱՊՀ Միջխորհրդարանական վեհաժողովի քառասունիններորդ լիագումար նիստը, որտեղ հանձնաժողովը կներկայացնի «Գնագոյացման մասին» մոդելային օրենքը,- ամփոփել է նա։
Հիշեցնենք, որ մարտի 14-ին տեղի էր ունեցել ԱՊՀ ՄԽՎ տնտեսության եւ ֆինանսների մշտական հանձնաժողովի նիստը։
