Ֆրանսիայի եւ Չինաստանի նախագահներ Էմանուել Մակրոնը եւ Սի Ցզինպինը կոչ են արել Եվրոպայում Պեկինի ներդրումների հետ կապված աճող նյարդայնության շրջանում ընդլայնել Եվրամիության եւ Չինաստանի միջեւ համագործակցությունը՝ հայտնում է AFP-ը։
Ցզինպինի հետ բանակցություններից հետո, ելույթ ունենալով Ելիսեյան պալատում, Մակրոնը «Եվրոպայի եւ Չինաստանի միջեւ ամուր գործընկերության» կոչ է արել՝ հավելելով, որ դա պետք է հիմնվի «ուժեղ բազմակողմանիության» եւ «արդար ու հավասարակշռված» առեւտրի վրա։
Ցզինպինն իր հերթին ընդգծել է, որ «միացյալ եւ բարգավաճող Եվրոպան համահունչ է բազմաբեւեռ աշխարհի մեր տեսլականին»։ «Չինաստանը միշտ կսատարի եվրոպական ինտեգրացիան եւ զարգացումը»,- հավելել է նա։
Հայտարարությունները հետեւել են տասնյակից ավելի գործարքների կնքմանը, որոնք վերաբերում են միջուկային էներգետիկային, մշակույթին, մաքուր էներգիային։ Կնքվել է համաձայնագիր Չինաստանի կողմից 290 հատ Airbus A320 եւ 10 հատ A350 գնելու մասին։
Կնքված համաձայնագրերի ընդհանուր արժեքը կազմել է 40 մլրդ դոլար։