«Բաժնետիրական ընկերությունների» մասին օրենքում փոփոխությունների նախագիծն առաջարկում է սահմանափակել դուստր կամ կախյալ ձեռնարկությունների կողմից մայր ընկերություններից բաժնետիրական մասնաբաժին ձեռք բերելու հնարավորությունը: Մարտի 26-ին Ազգային ժողովի նիստին «Բաժնետիրական ընկերությունների» «Սահմանափակ պատասխանատվությամբ ընկերությունների» մասին օրենքներում փոփոխություններ եւ լրացումներ կատարելու, ինչպես նաեև «Արժեթղթերի շուկայի մասին» օրենքում փոփոխություններ կատարելու մասին օրինագծերի փաթեթի քննարկման ժամանակ այս մասին ասաց հիմնական զեկուցող, տնտեսական զարգացման եւ ներդրումների նախարար Տիգրան Խաչատրյանը: Նրա խոսքով՝ դա արվել է ընկերությունների կառավարման թափանցիկության բարձրացման նպատակով:
ԲՀԿ կուսակցությունից պատգամավոր Միքայել Մելքումյանը հետաքրքվեց՝ կարող է արդյոք «Գազմպրոմ Արմենիա»-ի դուստր ձեռնարկությունը, որը գործում է Հայաստանում, մասնաբաժին ձեռք բերել ռուսական «Գազպրոմ» մայր ձեռնարկությունում: Խաչատրյանը նշեց, որ կարող է, սակայն հիմա նրանք որոշել են սահմանափակումներ մտցնել՝ անկախ նրանից, թե որ երկրներում են գտնվում դուստր եւ մայր ձեռնարկությունները:
