Փաստաթուղթն իրենից ներկայացնում է Իրանի եւ ԵՏՄ-ի միջեւ ազատ առեւտրի գոտու ստեղծման առաջին փուլը: Մարտի 26-ին ԱԺ նիստում ԵՏՄ-ի եւ Իրանի միջեւ ժամանակավոր համաձայնագրի վավերացման հարցի քննարկման ժամանակ այս մասին ասաց տնտեսական զարգացման եւ ներդրումների փոխնախարար Ալբերտ Բաբայանը:
Նա նշեց, որ ժամանակավոր համաձայնագիրը կնքվել է 3 տարի ժամկետով, որի ընթացքում կողմերը պետք է գան ազատ առեւտրի գոտու վերաբերյալ առավել լիարժեք համաձայնագրի մշակմանը: «Առավել բարենպաստ ռեժիմի ապահովման նպատակով համաձայնագրով նախատեսվում է կողմերի միջեւ հորիզոնական պարտավորվածությունների, ազգային ռեժիմների, ապրանքների արտահանման եւ ներմուծման թափանցիկություն, ինչպես նաեւ ընդհանուր առեւտրում պաշտպանական միջոցներ կիրառելիս ԱՀԿ նորմերի ապահովում»,- պարզաբանեց Բաբայանը: