Ապրանքների ցանկում կա նաեւ դիզելային վառելիք, եւ իրանական կողմը մաքսատուրքերի արտոնյալ տոկոսադրույք է ստացել՝ 5-ի փոխարեն 2,5 տոկոս։ Այս մասին մարտի 26-ին Հայաստանի Ազգային ժողովի նիստում, ԵՏՄ-ի եւ Իրանի միջեւ ժամանակավոր համաձայնագրի վավերացման մասին հարցը քննարկելիս, ասել է Հայաստանի տնտեսական զարգացման եւ ներդրումների փոխնախարար Ալբերտ Բաբայանը՝ պատասխանելով «Բարգավաճ Հայաստան» կուսակցության պատգամավոր Սերգեյ Բագրատյանի հարցին, որը հետաքրքրվեց, թե կարող են արդյոք հայ ձեռներեցները վառելիք ներմուծել Իրանից։ Ընդ որում՝ փոխնախարարը նշեց, որ հարկ է հաշվի առնել նաեւ այն, որ Հայաստանում գործում են տեխնիկական կանոնակարգեր, որոնք ինչպես դիզելային վառելիքի, այնպես էլ բենզինի որոշակի սահմանափակումներ են մտցնում։ «Եվ եթե Իրանում բավականաչափ քանակությամբ դիզելային վառելիք լինի, որը կհամապատասխանի ԵՏՄ տեխնիկական կանոնակարգին, ապա ներմուծման ոչ մի սահմանափակում չի ծագի»,- պարզաբանել է պաշտոնյան։
