Անցյալ տարվա ապրիլ-մայիսին Հայաստանում տեղի ունեցած ոչ բռնի հեղափոխությունից հետո երկրում ժողովրդավարական գործընթացներն անշրջելի են: Այս մասին ԵԽԽՎ նախագահ Լիլիան Մորի Պասկիեի հետ հանդիպումից հետո ճեպազրույցում հայտարարեց ԱԺ նախագահ Արարատ Միրզոյանը:
Նրա խոսքով՝ հանդիպման ժամանակ քննարկվել է տարբեր ոլորտներում համագործակցությունը, նշվել է երկրում ժողովրդավարական գործընթացների մեջ ԵԽԽՎ, մարդու իրավունքների հարցերով հանձնակատարի, Վենետիկի հանձնաժողովի կարեւոր դերը, նրանց աջակցությունը: Արձանագրվել է այն փաստը, որ անցյալ տարվա ապրիլ-մայիսին տեղի ունեցած ոչ բռնի հեղափոխությունից հետո ժողովրդավարական գործընթացներն անշրջելի են, հավելեց Միրզոյանը: Զրուցակիցներն անդրադարձել են նաեւ արտահերթ խորհրդարանական ընտրությունների արդյունքներով մոնիթորինգային կոմիտեի համազեկուցողների եւ դիտորդների բարձր գնահատականներին: Կողմերն արծարծել են Հայոց ցեղասպանության հարցը, մարդու իրավունքների պահպանման, շատ այլ հարցեր, որոնք համագործակցության օրակարգում են:
