Արատավոր բարքերը պետք է ի սպառ վերացվեն զորամասերից։ Այս մասին այսօր ԱԺ–ում լրագրողների հետ զրույցում հայտարարեց ԱԺ պատգամավոր, «Քաղաքացիական պայմանագիր» կուսակցության վարչության նախագահ Սասուն Միքայելյանը՝ անդրադառնալով օրերս Մեղրիի տարածքում տեղակայված ՀՀ ՊՆ զորամասերից մեկում գրանցված միջադեպին։
Պատգամավորը համոզմունք հայտնեց, որ նման երեւույթները ժամանակի ընթացքում կբացառվեն զորամասերում։
«Նման բաները պետք է արմատախիլ արվեն բանակից։ Բանակը պետք է զբաղվի իր գործունեությամբ։ Ով նման բան է ձեւավորել բանակում, պետք է պատժվի օրենքով»,–ասաց նա։
Հիշեցնենք, որ օրերս Մեղրիի զորամասերից մեկում զինծառայողներն ինքնակամ լքել են զորամասը՝ այդպիսով հայտնելով իրենց բողոքը: Դրանից հետո մի խումբ զինծառայողների մարտի 17-ին տեղափոխել են Կապանի, ապա Ստեփանակերտի կարգապահական զորամասեր, որտեղից էլ այնուհետեւ տարել են առաջնագիծ: Գնդի սպաների խոսքով՝ մասսայական այս ակցիան կազմակերպելու մեջ կասկածվող զինծառայողները պարբերաբար աչքի են ընկել ոչ կանոնադրային պահվածքով։
Հիշյալ միջադեպի փաստի առթիվ երկու քրեական գործ է հարուցվել՝ ՀՀ ՔՕ-ի 364-րդ հոդվածի 2-րդ մասով (Զինվորական ծառայության պարտականությունները կատարելուց հրաժարվելը) եւ ՀՀ ՔՕ-ի՝ 375-րդ հոդվածի 1-ին մասի (Իշխանությունը չարաշահելը, իշխանազանցությունը կամ իշխանության անգործությունը) հատկանիշներով։