Ժողովրդի ինքնորոշման իրավունքն իրականացվում է այդ ժողովրդի իրավունքների ոտնահարման ուղղակի սպառնալիքին զուգընթաց: Մարտի 29-ին «Ազգերի ինքնորոշման իրավունքը ժամանակակից միջազգային պրակտիկայում. հնարավորություններ եւ մարտահրավերներ» թեմայով միջազգային գիտագործնական համաժողովին այս մասին ասաց Ղրիմի Հանրապետության Նախարարների խորհրդի (Կառավարություն) փոխնախագահ, ՌԴ նախագահին առընթեր Ղրիմի Հանրապետության մշտական ներկայացուցիչ Գեորգի Մուրադովը:
Նրա խոսքով, Ռուսաստանն, ինչպես մագնիս, միշտ դեպի իրեն է ձգել տարբեր ժողովուրդների, որոնք նրա հետ կապված են եղել պատմական ճակատագրով: Այսօր Ռուսաստանի հետ ինտեգրման գործընթացը ուժեղանում է բարդ միջազգային գործընթացների ֆոնի վրա:
«2008 -ին Վրաստանում եւ 2014-ին Ուկրաինայում տեղի ունեցած իրադարձությունները դարձան յուրատեսակ հարձակում ինտեգրված ռուսական քաղաքակրթության վրա», - ասաց նա: Մուրադովը շեշտեց, որ Ղրիմում հանրաքվեն անցկացվել է ժողովուրդների ինքնորոշման միջազգային իրավունքի բոլոր նորմերին համապատասխան:
«Չնայած արեւմտյան երկրների ներկայացուցիչները Ղրիմում քաղաքական իրադարձությունները ոչ միանշանակ են մեկնաբանում, որպես «օկուպացիա» ներկայացնելով եւ որպես փաստարկ ներկայացնելով տարածքային ամբողջականության սկզբունքը, միջազգային իրավունքի նորմերի համաձայն` ժողովուրդների ինքնորոշման իրավունքն իրականացվում է հենց այդ ժողովրդի իրավունքների ոտնահարման ուղղակի սպառնալիքին զուգընթաց:
Ուկրաինայում իշխանության եկած հանցավոր խումբը ուղղակի սպառնալիք էր ներկայացնում Ղրիմի բնակիչների համար: Սա նշանակում է, որ հանրաքվեն եւ Ռուսաստանի հետ Ղրիմի հետագա վերամիավորումը քաղաքական-իրավական հիմք ունեին», - նշեց Ղրիմի փոխվարչապետը:
