Դոնալդ Թրամփի որոշումը՝ Իսրայելի տարածք համարել Գոլանի բարձունքները՝ կապված է ԱՄՆ գալիք ընտրությունների հետ։ Այս մասին NEWS.am-ի թղթակցի հետ զրույցում ասել է Ղրիմի Հանրապետության փոխվարչապետ, Ռուսաստանի Դաշնության նախագահին առընթեր ՂՀ մշտական ներկայացուցիչ Գեորգի Մուրադովը։
Նրա խոսքով՝ անգամ ԱՄՆ մերձավորագույն դաշնակիցներն են հրաժարվում ճանաչել Վաշինգտոնի նման որոշման ճշմարտացիությունն ու արդարությունը։ «Անշուշտ, սա ապօրինի ակտ է ԱՄՆ-ի կողմից։ Դա հակասում է ՄԱԿ Անվտանգության խորհրդի բանաձեւերին։ Ինչպես հայտնի է, այդ բանաձեւերը կապված են խաղաղության աջակցման հարցերի հետ։ Այդ որոշումները խախտել չի թույլատրվում ոչ մեկին։ Բայց Միացյալ Նահանգները կարծում է, որ կարող է այդպես վարվել։ Իրականում դա կարող է հանգեցնել լոկ միջազգային իրադրության բարդացման, այդ թվում Մերձավոր Արեւելքում։ Ամերիկացիներն իրենց ողջ միջազգային հանրությունից բարձր են դասում»,- նշել է ռուս պաշտոնյան։
Նա ընդգծել է, որ Դոնալդ Թրամփը հիմա գտնվում է ծանր իրավիճակում՝ կապված իր դեմ հերթական հետաքննության հետ։ «ԱՄՆ նախագահը պատրաստվում է ընտրությունների եւ փաստորեն փորձում է ստանալ ԱՄՆ-ում հրեական լոբբիի աջակցությունը»,- ամփոփել է Գեորգի Մուրադովը։
Ինչպես ավելի վաղ տեղեկացրել էր NEWS.am-ը, ԱՄՆ նախագահ Դոնալդ Թրամփը մարտի 25-ին Գոլանի բարձունքները ճանաչել է Իսրայելի մի մաս, ինչի մասին հայտարարվել է Իսրայելի վարչապետ Բենիամին Նեթանյահուի հետ համատեղ մամուլի ասուլիսում։ Նույն օրը Թրամփը ստորագրել է համապատասխան հրամանագիր։
Գոլանի բարձունքների մեծ մասը, որոնք միջազգայնորեն ճանաչված են Սիրիայի տարածք, Իսրայելը զավթել է 1967-ին։ Օրերս Իսրայելը օդային հարձակման է ենթարկել Հալեպը, որտեղ հայկական մեշ համայնք կա։
