Բուրունդիի իշխանություններն արգելափակել են «Բի-բի-սի»-ի հեռարձակումն ու անորոշ ժամկետով դադարեցրել «Ամերիկայի ձայն»-ի գործունեությունը երկրի ողջ տարածքում, հաղորդում է Reuters-ը:
BBC-ն արգելափակելու պատճառը Բուրունդիում գաղտնի բանտերի եւ դրանցում հալածանքների մասին բրիտանական հեռուստաընկերության վավերագրական ֆիլմն էր, որում արտացոլված տեղեկատվությունն, ըստ Բուրունդիի կառավարության, սուտ է եւ արատավորում է երկրի հեղինակությունը: BBC-ում հայտարարել են, որ այդ որոշումը հարված է ԶԼՄ-ների ազատության ուղղությամբ:
«Ամերիկայի ձայնը» ռադիոընկերության աշխատանքի արգելափակումը եւս երկարաձգվել էր: Դժգոհության պատճառն ընկերության թղթակիցն էր, որը քննադատում էր իշխանություններին:
Բացի այդ, լրագրողներին արգելել են աշխատել երկու կազմակերպություններում:
Բուրունդին գտնվում է Արեւելյան Աֆրիկայում: Այն աշխարհում ամենաքիչ զարգացած երկրներից է: Բուրունդիի ներկայիս նախագահ Պյեր Նկուրունզիզան պաշտոնավարում է 2005 թվականից: 2015 թվականին նախագահի պաշտոնում երրորդ անգամ նրա առաջադրումը բողոքի ցույցերի պատճառ էր դարձել: