Մենք պետք է միշտ ձգտենք խաղաղության, բայց հակառակորդը պետք է չունենա իր հենակետերից մեր բնակավայրերը կրակի տակ վերցնելու հնարավորություն։ Այս մասին այսօր՝ ապրիլի 2-ին, Եռաբլուրում լրագրողների հետ զրույցում հայտարարեց ՀՀ ԱԺ «Իմ քայլը» խմբակցության պատգամավոր, Պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանը։
«Մենք անընդհատ ձգտել ենք խաղաղության, բայց երբ ադրբեջանական հենակետներից հայտնվել ենք կրակի տակ, մենք այլ տարբերակ չենք ունեցել, քան այդ հենակետերին լռեցնելը Արցախի պաշտպանության բանակի կողմից։ Մենք պետք է միշտ ձգտենք խաղաղության, բայց հակառակորդը պետք է չունենա իր հենակետերից մեր բնակավայրերը կրակի տակ վերցնելու հնարավորություն»,–նշեց նա։
Անդրանիկ Քոչարյանը շեշտեց՝ Հայաստանի եւ Արցախի պաշտպանության բանակի եւ Հայաստանի անվտանգության համակարգը անընդհատ պետք է ուժեղացվի։
Պատգամավորը կարծում է՝ ապրիլյան պատերազմը մեր կողմից զգոնության կորստի պատճառ էր. «Երբ մենք աընդհատ ասում էինք, թե ունենանք տարածաշրջանում ամենամարտունակ բանակը, մեր զգոնությունը թուլացավ եւ ապրիլյան պատերազմը այս զգոնության կորստի պատճառ էր։ Մեր բանակը այսօր պետք է միշտ լինի զգոն վիճակում եւ զարգացման, ուժեղացման փուլում»։
Նա ընդգծեց, որ Հայաստանի ու Արցախի պաշտպանական գերատեսչություններն աշխատում են բանակի ուժեղացման եւ զարգացման ուղղությամբ. «Այսօր այդ խնդիրները դրված եւ այդ խնդիրների լուծման համար Հայաստանի ու Արցախի պաշտպանական գերատեսչություններն ունեն ծրագրեր, որոնք պետք է իրականացնեն։ Կարճ ժամանակահատվածում հակառակորդի համար էլ պետք է տեսանելի լինի, որ ուժեղ բանակի առկայությունն է, որ կզսպի ապրիլյան ավանտյուրայի կիրառումը հակառակորդի կողմից»։
Լրագրողները հետաքրքրվեցին՝ այսօր պատրա՞ստ ենք նոր պատերազմի նոր տարածքների համար, որին պատգամավորը պատասխանեց. «Այն կարմիր գիծը, որ գծված է եւ կոչվում է անվտանգության գոտի, այդ գոտին պետք է ամուր պահենք, մինչեւ որ հասնենք մեզ համար արժանապատիվ խաղաղ լուծմանը։ Մենք կհարձակվենք այն ժամանակ, երբ մեզ կպարտադրեն հարձակվել։ Մենք որեւէ ավելորդ տարածքի կարիք չունենք»։
Հիշեցնենք, որ ապրիլյան քառօրյա պատերազմի երրորդ տարելիցի կապակցությամբ, այսօր՝ ապրիլի 2-ին, քաղաքացիներն ու ՀՀ ղեկավար կազմն այցելել են Եռաբլուր զինվորական պանթեոն՝ հարգանքի տուրք մատուցելու Ապրիլյան պատերազմի զոհերի հիշատակին: