Եգիպտոսում ոստիկանը քրիստոնյա հայր եւ որդու սպանության համար մահապատժի է դատապարտվել՝ հայտնում է Reuters-ը։

Ոստիկան Ռաբի Խալիֆան սպանել է 49-ամյա շինարար Քամալ Սադեկին եւ նրա 21-ամյա որդուն՝ Դեւիդին։ Միջադեպը, որ տեղի է ունեցել դեկտեմբերին, զայրացրել էր քրիստոնյա ղպտիներին, որոնք դեռեւս ուշքի չէին եկել դրանից մեկ ամիս առաջ իսլամիստ զինյալների հարձակման հետեւանքով յոթ ղպտիների սպանությունից հետո։

Ղպտիները, որոնք կազմում են Եգիպտոսի բնակչության 10 տոկոսը, վաղուց բողոքում են խտրականությունից։ Նրանց վրա հաճախ են հարձակվում իսլամիստ զինյալները, որոնք ղպտիներին «անհավատ» են համարում։ Այս հանգամանքը իշխանություններին ստիպել է զինված պահակներ տեղակայել նրանց եկեղեցիների եւ վանքերի մոտ։