ՆԱՏՕ անդամ երկրների արտգործնախարարները կքննարկեն Թուրքիայի կողմից ռուսական Ս-400-ներ գնելու հետ կապված իրավիճակը։ Այս մասին Վաշինգտոնում լրագրողներին հանդիպումից առաջ ասել է ՆԱՏՕ գլխավոր քարտուղար Ենս Ստոլտենբերգը։
Նրա խոսքով՝ ՆԱՏՕ յուրաքանչյուր դաշնակից ինքն է որոշում կայացնում սպառազինություն ձեռք բերելու մասին։ «Բայց եւ միեւնույն ժամանակ մենք տեսնում ենք, որ դա խնդիր է, որը տարաձայնություններ է առաջացրել դաշնակիցների միջեւ։ Իսկ ՆԱՏՕ-ն հարթակ է տրամադրում դաշնակիցներին նման հարցերը լուծելու համար։ Ս-400-ների ձեռքբերման հարցը ներառված չէ այսօրվա հանդիպման օրակարգում, բայց ես, իհարկե, սպասում եմ, որ այդ հարցը կդիտարկվի հանդիպման կուլուարներում»,- նշել է նա։
Ստոլտենբերգը նշել է, որ ՆԱՏՕ-ն աջակցություն է ցուցաբերում Թուրքիային։ «Մենք համալրում ենք Թուրքիայի հակաօդային պաշտպանությունը Patriot մարտկոցների տեղադրմամբ։ Իսպանիան ՆԱՏՕ անունից տեղակայել է «Փաթրիոթ» մարտկոցներ Թուրքիայում։ Իտալիան Թուրքիայում տեղադրել է ՀՕՊ SAMP / T համակարգ։ Այսպիսով, ՆԱՏՕ-ն աջակցություն է ցուցաբերում, մենք արդեն ուժեղացնում ենք Թուրքիայի հակաօդային պաշտպանությունը, բայց, իհարկե, ես սպասում եմ, որ այս հարցը կքննարկվի նաեւ հանդիպման կուլուարներում»։