Ապրիլի 7-ին ժամը 10:00-ին տեղի է ունենալու Ստեփանակերտի Աստվածամոր Սուրբ Հովանի Մայր Տաճարի օծման եւ բացման պաշտոնական արարողությունը:
Տաճարի օծման առաջին փուլը, որը կոչվում է «լվացում», տեղի է ունենալու այսօր՝ ապրիլի 6-ի երեկոյան: Իսկ վաղը՝ ժամը 10:00-ին, տեղի է ունենալու Աստվածամոր Սուրբ Հովանի Մայր Տաճարի օծման արարողությունը: Ժամը 11:00-ին էլ Գարեգին Բ Ամենայն հայոց կաթողիկոսի ձեռամբ կմատուցվի առաջին պատարագը:
Մայր Աթոռի տեղեկատվական համակարգի տնօրեն Վահրամ քահանա Մելիքյանը NEWS.am-ին հայտնեց, որ արդեն այսօր Արցախ է մեկնելու Գարեգին Բ ամենայն հայոց կաթողիկոսը: Նա կհանդիսապետի եւ կօծի Ստեփանակերտի Աստվածամոր Սուրբ Հովանի առաջնորդանիստ եկեղեցին: Գարեգին Բ-ին ուղեցող շքախմբի մեջ են արքեպիսկոպոսներ, վարդապետներ, քահանաներ:
Արցախի նախագահի աշխատակազմի ղեկավաի տեղակալ Դավիթ Բաբայանն էլ նշեց, որ արարողությանը ներկա են լինելու ինչպես Արցախի նախագահ Բակո Սահակյանը, այնպես էլ կռավարության գրեթե բոլոր անդամները՝ պետտնախարարի գլխավորությամբ:
Ավելի վաղ մամուլում տեղեկություններ էին հայտնվել, որ հանդիսավոր արարողությանը մասնակցելու է ՀՀ երրորդ նախագահ Սերժ Սարգսյանը: Հայաստանի իշխանությունների կողմից արարողությանը հաստատ մասնակցելու է ԱԱԾ տնօրեն Արթուր Վանեցյանը: ՀՀ նախագահ Արմեն Սարգսյանն արտերկրյա հանդիպման է՝ Հորդանանի Թագավորություն եւ Պորտուգալիա, ԱԺ նախագահ Արարատ Միրզոյանը այսօր մեկնում է Կատար: Ինչ վերաբերում է ՀՀ վարչապետ Նիկոլ Փաշինյանին, նա, մեր տեղեկություններով, մասնակցելու է ԵԿՄ համագումարին եւ նույնպես չի մեկնի Արցախ:
Նշենք, որ հանդիսավոր արարողությանը ներկա են լինելու Մայր տաճարի կառուցման առաջին բարերար լուսահոգի Հրանտ Վարդանյանի երկու որդիներ՝ Կարեն եւ Միքայել Վարդանյանները. նրանց ընտանիքը ընդհանուր առմամբ նվիրաբերել է 400 մլն դրամ:
