Իրանում պատրաստ է օրենքի նախագիծը, համաձայն որի՝ ԱՄՆ-ի զինված ուժերը կներառվեն ահաբեկիչների ցանկում: Այդ մասին հայտնել է Իրանի ազգային անվտանգության եւ արտաքին քաղաքականության հարցերով խորհրդարանական հանձնաժողովի նախագահ Հեշմաթոլա Ֆալահաթփիշեխը, հաղորդում է Mehr-ը:
«Եթե ամերիկացիները թույլ տան այդ սխալը եւ ավելացնեն իսլամական հեղափոխության պահապանների կորպուսը ահաբեկիչների ցանկում, այդ օրինագիծը կրկնակի սեղմ ժամկետներում կհաստատվի Իրանի խորհրդարանի կողմից»,-նշել է նա:
Նրա խոսքերով՝ ԱՄՆ-ի նախագահ Դոնալդ Թրամփը «խոստովանել է, որ «Իսլամական պետությունը» ստեղծվել էր Միացյալ Նահանգների կողմից», եւ Իրանի զինված ուժերը հաղթել են այդ ահաբեկիչներին:
Ավելի վաղ Wall Street Journal-ը հաղորդել էր, որ ԱՄՆ-ի պաշտոնական դեմքերը մտադիր են ճանաչել Իսլամական հեղափոխության պահապանների կորպուսը որպես օտարերկրյա ահաբեկչական կազմակերպություն: WSJ-ի հաղորդմամբ, այդ մասին կարող է հայտարարվել երկուշաբթի՝ ապրիլի 8-ին: Եթե դա տեղի ունենա, ապա առաջին անգամ այլ երկրի զինված ուժերը կհայտարարվեն որպես ահաբեկչական խմբավորում:
