Մաջիդ Թահթ-Ռավանչին նշանակվել է ՄԱԿ-ում Իրանի նոր մշտական ներկայացուցիչ։ Ինչպես երեքշաբթի տեղեկացրել է Mehr գործակալությունը, Իրանի արտաքին քաղաքական գերատեսչության պաշտոնական ներկայացուցիչ Բահրամ Ղասեմին ասել է, որ Թահթ-Ռավանչին այդ պաշտոնին նշանակվել է ԱԳՆ ղեկավար Ջավադ Զարիֆի առաջարկով եւ նախագահ Հասան Ռոուհանիի հավանությամբ, տեղեկացնում է ՏԱՍՍ-ը։
Գործակալության տվյալների համաձայն՝ Թահթ-Ռավանչին նախագահի աշխատակազմի փոխտնօրենն է։ Մեհրը նշում է, որ մշտական ներկայացուցչի պաշտոնը թափուր էր մի քանի ամիս այն բանից հետո, երբ ՄԱԿ-ում Իրանի նախկին մշտական ներկայացուցիչ Գոլյամ Ալի Խոշրոուն հրաժարական էր տվել անցած տարեվերջին։
Ինչպես նշում է գործակալությունը, Թահթ-Ռավանչին երկրի դեսպանն էր Շվեյցարիայում, ինչպես նաեւ եղել է փոխարտգործնախարար Եվրոպայի եւ ԱՄՆ հարցերի գծով։ IRNA գործակալությունը տեղեկացնում է, որ նա նաեւ եղել է դեսպան եւ ՄԱԿ-ում Իրանի մշտական ներկայացուցչի տեղակալ։
Reuters գործակալությունն իր հերթին նշում է, որ 61-ամյա Թահթ-Ռավանչին բանակցողներից մեկն էր, որն օգնել է Թեհրանին 2015-ին հասնել Ռուսաստանի, Մեծ Բրիտանիայի, Չինաստանի, ԱՄՆ-ի, Ֆրանսիայի եւ Գերմանիայի հետ Իրանի միջուկային ծրագրի շուրջ գործողությունների համատեղ համապարփակ ծրագրի ստորագրմանը։
2018 թվականի մայիսի 8-ին ԱՄՆ նախագահ Դոնալդ Թրամփը հայտարարեց, որ Վաշինգտոնը դուրս է գալիս վերոնշյալ ծրագրից, գործարք, որը սահմանափակում է Թեհրանի միջուկային մշակումները ՄԱԿ Անվտանգության խորհրդի պատժամիջոցները եւ ԱՄՆ-ի ու ԵՄ-ի միակողմանի սահմանափակիչ միջոցները հանելու դիմաց։ Անցած տարվա նոյեմբերին վերականգնվեցին ԱՄՆ պատժամիջոցներն ընդդեմ Իրանի նավթային հատվածի։