Վերաքննիչ քրեական դատարանն այսօր՝ ապրիլի 11-ին մերժեց Հայաստանի երկրորդ նախագահ Ռոբերտ Քոչարյանի կալանավորումը ևս երկու ամսով երկարացնելու դեմ պաշտպանների ներկայացրած վերաքննիչ բողոքը: Ռոբերտ Քոչարյանը կշարունակի մնալ կալանքի տակ։ Այս մասին լրագրողների հետ զրույցում հայտնեց Ռոբերտ Քոչարյանի պաշտպան Հայկ Ալումյանը։

Նրա խոսքով՝  Ռոբերտ Քոչարյանը շատ հանգիստ է արձագանքել Վճռաբեկի որոշմանը. «Շատ ավելի հանգիստ, քան իր պաշտպանները»։

Պաշտպանը շեշտեց՝ պարտադիր բողոքարկելու են Վճռաբեկի որոշումը։ «Դատարանի որոշումը դեռ չենք ստացել, բայց իհարկե բողոքարկելու ենք։ Հիմքերի մասին այս պահին ոչինչ չեմ կարող ասել։ Առաջին ատյանի դատարանը առհասարակ որեւէ պատճառաբանություն չէր պարունակում եւ մեր բողոքներից մեկի հիմքը ամբողջությամբ  դա էր, սակայն Վերքննիչ դատարանի դա տպավորություն չթողեց, Վերաքննիչը գտավ, որ կարելի է չպատճառաբանված անձին պահել կալանքի տակ»։

Նա նաեւ նկատում է՝ դատարանի փաստարկը, որ Քոչարյանը մնալով ազատության մեջ, կարող է խոչընդոտել քննությանը, եւս տարակուսելի է.  «Դատարանի փաստարկը այն է, որ Քոչարյանը մնալով ազատության մեջ, կարող է խոչընդոտել քննությանը, սակայն քննությունն արդեն ավարտվել է։ Եվրոպական դատարանը ի դեպ հենց այդ տեսակետն է կիսում, որ միայն քննության սկզբնական փուլերում է քննությանը խորընդոտելու հավանականությունը էական դեր խաղում, քննության ավելի ուշ փուլերում այն էական դեր չի խաղում»։

Հիշեցնենք, որ մարտի 15-ին առաջին ատյանի դատարանը բավարարել էր Հատուկ քննչական ծառայության միջնորդությունը՝ Ռոբերտ Քոչարյանի նկատմամբ ընտրված խափանման միջոց կալանավորման ժամանակը եւս երկու ամսով երկարացնելու վերաբերյալ:

Միաժամանակ դատարանը մերժել էր պաշտպանական խմբի կողմից գրավը թույլատրելի ճանաչելու վերաբերյալ միջնորդությունը:

Դատարանը հիշյալ որոշմամբ արձանագրել էր նաեւ, որ Ռոբերտ Քոչարյանին առաջադրված կաշառքի դրվագով հիմնավոր կասկածը բացակայում է:

Առաջին ատյանի դատարանի այս որոշումը Ռոբերտ Քոչարյանի պաշտպանական խումբը բողոքարկել է Վերաքննիչ դատարան:

Քոչարյանը մեղադրվում է ՀՀ քրեական օրենսգրքի 300.1-րդ հոդվածի 1-ին մասով եւ 311-րդ հոդվածի 4-րդ մասի 2-րդ մասով` ՀՀ սահմանադրական կարգը տապալելու եւ առանձնապես խոշոր չափերով կաշառք ստանալու համար:

Փետրվարի 15–ին ՀՔԾ–ն հայտարարեց 2008 թվականի մարտի 1-ից 2-ն ընկած ժամանակահատվածում Երեւան քաղաքում տեղի ունեցած իրադարձությունների վերաբերյալ քննվող քրեական գործով նախաքննության ավարտի մասին։

Այս գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը եւ ՀՀ նախկին փոխվարչապետ Արմեն Գեւորգյանը։