Զինված խումբ էր, թե զինված խմումբ չէր, քննիչն այդպիսի որոշում էր կայացրել, միջնորդել էր դատարան,սանկցիա վերցրել եւ կատարել է քննչական գործողություն: Այդ մասին այսօր՝ ապրիլի 11-ին, լրագրողների հետ զրույցում ասաց ՊԵԿ նախագահ Դավիթ Անանյանը՝ պատասխանելով հարցին, թե ինչո՞ւ էին 40 ՊԵԿ աշխատակիցներ գնացել «Առինջ մոլ» ստուգումների, մի թե զինված խումբ էին գնում վնասազերծելու:
«Մասնագետների գնահատմամբ, դատական սանկցիան կատարելու համար պետք է չորս հոգի, 40 հոգի, թե՝ 140 հոգի: Եթե որոշում կայացվեր, որ հազար հոգի է պետք, մենք այդ հազար հոգու ռեսուրսն էլ ունեինք տրամադրելու համար»,- ասաց Անանյանը:
Դիտարկմանը, որ այդ ստուգումներում քաղաքական ենթատեքստեն տեսնում մադրիկ, Անանյանն ասաց. «Դե, թող տեսնեն: Ես էլ, օրինակ, կենցաղային ենթատեքստ եմ տեսնում: Ամեն մեկն իր կարծիքը կարող է ասել»:
Հիշեցնենք, որ ապրիլի 9-ին, ՊԵԿ Հետքննության և օպերատիվ հետախուզության վարչության աշխատակիցները` դատարանի որոշման հիման վրա խուզարկություն են իրականացրել «Ֆիրմա Նյու» սահմանափակ պատասխանատվությամբ ընկերությունում (հանդիսանում է «Առինջ մոլ» առևտրի շուկայի կազմակերպիչը): Խուզարկությունն իրականացվում է ընկերության նկատմամբ ՀՀ Քրեական օրենսգրքի 205-րդ հոդվածի (հարկը, տուրքը կամ պարտադիր այլ վճարը չվճարելը) հատկանիշներով հարուցված քրեական գործի շրջանակներում:
