Վրաստանի վարչապետ Մամուկա Բախտաձեն մեկնաբանել է Թբիլիսիում ադրբեջանցի լրագրող Աֆղան Մուհթարլիի առեւանգման եւ նրան Ադրբեջանի իշխանություններին հանձնելու շուրջ ստեղծված իրավիճակը։
Ինչպես տեղեկացնում է www.contact.az-ը, այս թեմայով հարցը տրվել է ապրիլի 10-ին Ստրասբուրգում, ԵԽԽՎ նստաշրջանում նրա ելույթի ժամանակ։ Հարցը տվել է Ադրբեջանի գծով ԵԽԽՎ մոնիթորինգի կոմիտեի զեկուցող Շտեֆան Շեննակը։ Նա հարցրել է, թե ինչ են արել իշխանությունները՝ պարզելու եւ պատժելու համար այն անձանց, ովքեր մասնակցել են առեւանգմանը։
«Աֆղան Մուհթարլի գործը շատ զգայուն է։ Մենք, իհարկե, կապ պահպանում ենք ադրբեջանցի գործընկերների հետ եւ համակարգում ենք մեր աշխատանքը։ Քննությունը շարունակվում է, եւ ես կարող եմ տալ իմ գնահատականները, երբ քննությունն ավարտվի»,- ասել է Բախտաձեն։
Իր թվիթերում Շտեֆան Շեննակը գրել է, որ Բախտաձեի պատասխանը նրան չի բավարարել։ «Վրաստանի իշխանությունները պատասխանատվություն են կրում այդ գործի համար, նրանք չեն ցանկանում գիտակցել, որ անտեսում են մարդու իրավունքների նման խախտումը»,- նշել է Շեննակը։
Հիշեցնենք, որ ադրբեջանցի ընդդիմադիր լրագրող Աֆղան Մուհթարլին առեւանգվել էր ոստիկանության աշխատակիցների կողմից Վրաստանի կենտրոնում 2017-ի մայիսին։ Մեկ օր անց նա հայտնվել էր Բաքվում, որտեղ ձերբակալվել էր սահմանն ապօրինի հատելու եւ մաքսանենգության մեղադրանքով։ Դատարանը նրան 6 տարվա ազատազրկման է դատապարտել։
