Պատահական չէ, որ ԵԽԽՎ այս ամբիոնը ես անվանեցի խաղաղության ամբիոն. հավատում եմ, որ սա այն տեղն է, որտեղ հայհոյանքին պետք է փոխարինի երկխոսությանը, սադրանքին պետք է փոխարինի կառուցողական աշխատանքը: Այս մասին այսօր՝ ապրիլի 11-ին, ԵԽԽՎ-ում ունեցած իր ելույթում նշեց ՀՀ վարչապետ Նիկոլ Փաշինյանը:
«Բայց ցավոք, ԵԽԽՎ ամբիոնը երբեմն օգտագործվում է նաեւ պատերազմներ հրահրելու համար: Այս առումով չեմ կարող չնկատել, որ ԼՂ խնդրին առնչվող այն քննարկումները, որ ԵԽԽՎ-ում տեղի ունեցավ 2016-ի հունվարին, նույն թվականի ապրիլին բռնկված 4-օրյա պատերազմի նախերգանքը դարձան եւ բարենպաստ հող ստեղծեցին Ադրբեջանի զինված ուժերի կողմից հարձակողական գործողություններ սկսելու համար:
Չեմ ուզում վստահորեն պնդել, որ գիտակցաբար, բայց այնուամենայնիվ, այդ քննարկումների ու փաստաթղթերի հեղինակները պատերազմի հրձիգ դարձան, որը մի քանի հարյուր կյանք արժեցավ թե Հայաստանի, թե Լեռնային Ղարաբաղի, թե Ադրբեջանի համար: Այսօր էլ ցավոք, ինչպես միջազգային այլ հարթակներում, այնպես էլ ԵԽԽՎ-ում մենք տեսնում ենք այդ կառույցները աշխարհաքաղաքական, կոնֆլիկտների մեջ ներքաշելու, հակամարտության կողմ դարձնելու փորձեր, ինչը բացարձակապես հակառակ է այդ կազմակերպությունների էությանն ու առաքելությանը»,-ասաց նա: