Ալժիրի ոստիկանությունը երկրի մայրաքաղաքում ցուցարարների դեմ ջրցան մեքենա է կիրառել, ովքեր արդեն 8-րդ շաբաթն է դուրս են գալիս մայրաքաղաքի փողոցներ՝ բողոքելով իշխանությունների դեմ, հաղորդում է Associated Press-ը:
Գործակալությունը նշում է, որ բողոքի շարժումը խաղաղ էր, սակայն փողոցներում ոստիկանները սովորականից շատ էին:
Դեպքի վայրից գործակալության թղթակիցը հաղորդել է, որ ոստիկանությունը Ալժիրի Դիդուշ Մուրադի փողոցում արցունքաբեր գազ է կիրառել կենտրոնական փոստի մոտ, որը դարձել է շարժման խորհրդանիշը:
Դեռ հայտնի չէ, թե ինչն է ստիպել ոստիկանությանը ուժ կիրառել:
Փողոցը լցված է եղել Ալժիրի դրոշները ծածանող ցուցարարներով, որոնք վանկարկում էին «Իշխանությունները մարդասպան են»: Այնուհետ նրանք շրջափակել են ջրցան բեռնատարը՝ փորձելով տեղաշարժել այն:
Հիշեցնենք, որ ապրիլի 3-ին հայտնի դարձավ նախագահ Աբդելազիզ Բուտեֆլիկի հրաժարականի մասին: Այս պաշտոնում նրան փոխարինել էր խորհրդարանի Վերին պալատի ղեկավար Աբդելքադեր Բենսալահը:
82-ամյա նախագահը հրաժարական էր տվել այն բանից հետո, երբ երկրի ղեկավարը պահանջել էր անհապաղ միջոցներ ձեռնարկել նրան պաշտոնանկ անելու համար:
Ավելի քան ութ շաբաթ հազարավոր մարդիկ դուրս են գալիս մայրաքաղաքի փողոցները՝ պահանջելով փոխել քաղաքական համակարգը, որը շատերն անզոր են համարում բարեփոխումների իրականացման համար:
2013-ին կաթված ստանալուց հետո Բութեֆլիկը հազվադեպ էր հանրության առաջ հայտնվում: