Գյուղատնտեսության նախարարությունը նախաձեռնում է հողային բարեփոխումներ, որի արդյունքում հողերի չօգտագործման դեպքում սեփականատերը պարտավոր կլինի այն վարձակալության տալ։ Այս մասին այսօր՝ ապրիլի 15-ին, լրագրողների հետ հանդիպմանն ասաց ՀՀ գյուղատնտեսության նախարարի պաշտոնակատար Գեղամ Գեւորգյանը։
«Գաղտնիք չէ, որ ՀՀ-ում վարելահողերի 40 տոկոսն այս կամ այն պատճառով չի օգտագործում՝ սեփականատերերի 20 տոկոսը ՀՀ-ում չեն, մյուս մասն էլ արդյունավետ չի համարում մշակումը։ Պետք է իրականցնենք հողային ռեֆորմի գույքագրում, բացահայտենք հողային ռեսուրսների չօգտագործման պատճառները: Կլինեն նաեւ օրենսդրական փոփոխություններ, որով պարտադիր կլինի հողերի վարձակալումը։ Սա չի նշանակում, որ մարդուց խլում ենք սեփականությունը, այլ մարդը կմնա սեփականատեր, բայց եթե չի օգտագործում հողը, ապա կտա վարձով»,–նշեց նա։
Նախարարի պաշտոնակատարի խոսքով՝ կլինեն նաեւ հողերի միավորում. «Կան մարդիկ, որոնք մեկ հեկտար հող ունեն, բայց միմյանցից անջատ։ Այստեղ նաեւ հողերի կոնսոլիդացիայի իմաստն ենք դրել. ժամանակին երբ հողերը բաժանվել կամ մասնավորեցվել են, ստացվել է այնպես, որ մարդը 1 հեկտար հող ունենա, բայց երեք կտորից բաղկացած, որոնք տարբեր տեղերում են գտնվում, ինչը բավական դժվարացնում է ագրոտեխնիկական միջոցառումը եւ ինքնարժեքի վրա լուրջ ազդեցություն է ունենում։ Կոնսոլիդացիայի միջոցով կկարողանանք համաչափ հողերն իրար կպցնել, տարբեր սեփականատերերի հողերի փոխանակում կազմակերպել»,–ընդգծեց նա
Գեղամ Գեւորգյանը շեշտեց՝ եթե գյուղացին ցանկանում է վաճառել հողը, բայց գնորդ չունի, ապա պետությունը կգնի եւ փաթեթով կվաճառի։
Նա հայտնեց, որ բարեփոխումների մեկ այլ ուղղություն է կոոպերացումը, որպեսզի մարդիկ համատեղ աշխատեն, նախարարի պաշտոնակատարի խոսքով՝ այս ուղղությամբ եւս օրենսդրական նախաձեռնությամբ հանդես կգան։
Գեղամ Գեւորգյան նաեւ կարեւորեց ռիսկերի մեղմումը, քանի որ գյուղատնտեսությունն ինքին ռիսկային գործունեության տեսակ է։ Նա հավաստիացրեց՝ եթե ռիսկերը ճիշտ կառավարվեն, ապա կարող են մեղմել խնդիրները՝ հիվանդությունների դեմ պայքարը՝ թե խոշոր եղջերավոր կենդանիների, թե բուսաբուծության պարագայում։
