Եվրահանձնաժողովը պատրաստ է քաղաքացիական պաշտպանության իր եվրոպական մեխանիզմը գործարկել Ֆրանսիային Աստվածամոր տաճարի հրդեհի կապակցությամբ ցանկացած օգնություն ցույց տալու համար: Այս մասին ասվում է Բրյուսելում տարածված հումանիտար օգնության եւ ճգնաժամային կառավարման եվրահանձնակատար Խրիստոս Ստիլիանիդիսի հայտարարությունում, գրում է ՏԱՍՍ-ը:
«Եվրահանձնաժողովը պատրաստ է քաղաքացիական պաշտպանության իր եվրոպական մեխանիզմը գործարկել Ֆրանսիային ցանկացած անհրաժեշտ օգնություն ցույց տալու համար, - ասել է նա,-սարսափելի հրդեհի կապակցությամբ մենք անդադար կապի մեջ ենք Ֆրանսիայի իշխանությունների հետ»:
Եվրոպական քաղաքացիական պաշտպանության մեխանիզմը հնարավորություն է տալիս բոլոր երկրներին արագ ցանկացած ռեսուրս (փրկարարական տեխնիկա, տրանսպորտային միջոցներ, մասնագետներ, բժշկական անձնակազ) տրամադրել, որոնք կարող են անհրաժեշտ լինել արտակարգ իրավիճակում հայտնված ԵՄ երկրին, որը նա չի կարող ինքնուրույն հաղթահարել:
Ստիլիանդիսը, որը Եվրահանձնաժողովում պատասխանատու է արտակարգ իրավիճակների արձագանքման համար, իր հիացմունքն է արտահայտել Փարիզի հրշեջների մասին, որոնք իրենց ամբողջ փորձն օգտագործել են Փարիզի Աստվածամոր տաճարում հրդեհի դեմ պայքարի համար»:
Հրշեջներին հաջողվել է կանգնեցնել կրակի տարածումը եւ փրկել տաճարի երկու զանգակատները:
Փարիզի հրշեջ ծառայության պետ գեներալ Ժան Կլոդ Գալլեն հաղորդել է, որ Փարիզի Աստվածամոր տաճարի հիմնական կառուցվածքը փրկվել է ավերումից: Նրա խոսքով այժմ հրշեջների գլխավոր խնդիրն է սառեցնել կրակից տաքացած շենքը հատկապես վերին հատվածում գտնվող մետաղական կոնստրուկցիայով շինափայտերը, որոնք կարող են մասամբ փլուզվել:
Ներկայումս հրդեհի հետեւանքով ոչնչացվել է տաճարի տանիքի երկու երրորդը, տուժել է մեկ հրշեջ: Փարիզի հրշեջների ղեկավարի խոսքով՝ կրակի դեմ պայքարը եւ մշակութային եւ կրոնական արժեքների փրկությունը կշարունակվի ողջ գիշեր: Արտակարգ իրավիճակի վայրում աշխատում է մոտ 400 հրշեջ, որոնք ամեն 1.5 ժամը մեկ փոխարինում են իրար: Փարիզի դատախազությունը հրդեհի կապակցությամբ քրեական գործ է հարուցել:
