Եթե պարոն Ծառուկյանն այդպիսի բան է ասել, ճիշտ կլինի իրենից էլ ճշտեք, մենք պաշտպանում ենք Հայաստանի տնտեսական շահերը՝ ի հեճուկս որոշ բիզնես խմբերի շահերի: Այս մասին, այսօր՝ ապրիլի 16-ին, ԱԺ-ում լրագրողների հետ զրույցում նշեց ԱԺ տնտեսական հարցերի հանձնաժողովի նախագահ Բաբկեն Թունյանը՝ անդրադառնալով ԲՀԿ առաջնորդ Գագիկ Ծառուկյանի հայտարարությանը, թե Թունյանը, Սիսեռյանը, Սարգսյանը եւ եւս մի 4-րդ անձ երեկ երեկոյան քննարկել են ներմուծվող ցեմենտի տուրքի հարցը եւ ծանոթ-խնամի հարաբերություններով հարցեր են լուծում:
Բաբկեն Թունյանը նշեց. «Մենք կայացնում ենք որոշում, որը բխում է ՀՀ շահերից, ոչ թե առանձին մեկ ընկերության: Երբ այդ հարցը քննարկվի, ես բոլոր պարզաբանումները կներկայացնեմ, թե ինչ ենք արել, ինչ նպատակով եւ ինչ ենք կանխարգելել:
Հանձնաժողովի նիստն անցել է մոտ 10-իօց ավելի անդամի ներկայությամբ, այդ թվում այլ հանձնաժողովներից: Դրան մասնակցում էին նաեւ ԲՀԿ-ի պատգամավորները, այդ թվում ԲՀԿ-ի այն պատգամավորները, որոնք մեր հանձնաժողովի անդամ չեն: Կարող եք տեսագրությունը նայել, թե ինչ կարծիքներ են հնչել, ինչպես են քննարկել»:
Հարցին, իսկապե՞ս իրենք կոնկրետ մեկի շահերն են պաշտպանում, հանձնաժողովի նախագահը հերքեց նման տեղեկությունը՝ հավելելով. «Ով նման հայտարարություն է անում, նա էլ պետք է իր հայտարարության համար պատասխան տա: Եթե չպատասխանեց, նշանակում է պատասխան չունի»:
Նա համաձայնեց տեսակետին, որ եթե ներմուծվող կլինկերի համար եւս պետական տուրք սահմանվեր, Ծառուկյանի գործարանը կհայտնվեր ավելի շահեկան վիճակում, քան մյուսները. «Այո, այդպես է, որովհետեւ, եթե մի ընկերություն արտադրում է մի հումքով, որը դու պետական տուրքի տակ ես մտցնում եւ արհեստականորեն թանկացնում ես հումքը, այդ ընկերությունը տուժում է:
Հարցին, թե ինչու են որոշել, որ ներկրվող ցեմենտի համար սահմանում են պետական տուրք, իսկ կլինկերի համար, որը ըստ Ծառուկյանի ցեմենտի 90 տոկոսն է, որոշվել է տուրք չկիրառել, Թունյանը պատասխանեց. «Որովհետեւ կլինկերը հանդիսանում է ցեմենտի հումք, որով արտադրում են նաեւ այլ գործարարներ: Այսինքն եթե խոսում ենք տեղական արտադրողին օգնելու մասին, չի կարելի մեկին օգնել, մյուսին չօգնել: Ես Ծառուկյանի հետ խնդիր չունեմ, մեր խնդիրն այնպես է եղել, որ բոլորի համար հավասար պայմաններ ապահովվեն»:
Դիտարկմանը, թե հիմնավո՞ր են Ծառուկյանի պնդումները, որ «Արարատցեմենտ» ընկերությունը շահույթ չի կարողանա ստանալ, եթե կլինկերի ներմուծման տուրք չսահմանվի, Թունյանը պատասխանեց. «Ժամանակը կգա, կտեսնեք, թե այդ ընկերությունն ինչ է անելու: Մի բան էլ կարող եք հարցնել՝ իրենք էստեղ քաղաքական շահե՞ր են ներկայացնում, թե՞ կոնկրետ բիզնեսի շահեր: Որովհետեւ ամբողջ խմբակցությունը ֆիքսվել է մեկ ընկերության վրա: Միաժամանակ, երբ մեկին մեղադրում են, ասում են՝ դու ինչ-որ ծանոթ-բարեկամ ունես, դա լրիվ անհասկանալի է, որովհետեւ հենց իրենք են այդ թեմայի վրա ֆիքսվել: Մենք ֆիքսվում ենք ընդհանուր տնտեսության վրա՝ առանց որեւէ ընկերություն առանձնացնելու»:
Բաբկեն Թունյանն ասաց, որ այս հարցը վարչապետ Նիկոլ Փաշինյանի հետ չեն քննարկել. «ԱԺ-ն կառավարությունից առանձին մարմին է, իշխանության առանձին թեւ է: Այս դեպքում հակասական իրավիճակ է, ստացվում է, որ կառավարության նախագծին «Իմ քայլը» խմբակցությունը շատ ավելի դեմ է, քան ԲՀԿ-ն»:
Ավելի վաղ NEWS.am-ը հայտնել էր, որ կառավարությունը նախագիծ էր ներկայացրել ԱԺ, ըստ որի տեղական արտադրողին աջակցելու նպատակով 22 հազար դրամ պետական տուրք է սահմանվում թե ներկրվող ցեմենտի, թե ներկրվող կլինկերի վրա: Սակայն ԱԺ տնտեսական հանձնաժողովում որոշվել է, որ տուրքը պետք է սահմանվի միայն ներկրվող ցեմենտի վրա: Դրանից հետո «Մուլտի գրուպ»-ում որոշել են, որ այդ դեպքում իրենք ոչ թե կարտադրեն կլինկերը, այլ էժան կբերեն Իրանից, իսկ դա նշանակում է, որ «Արարատցեմենտի» շուրջ հազար աշխատակիցների կարիքը չկա: Վերջիններս ծանուցագրեր են ստացել, որ երկու ամսից ազատվելու են աշխատանքից: