«Գազպրոմ Արմենիայի» հետ քննարկվում են գազի սակագները։ Այս մասին Ազգային ժողովի նիստում, Հանրային ծառայությունները կարգավորող հանձնաժողովի նախագահի նշանակման հարցի քննարկման ժամանակ, ասել է այդ պաշտոնի միակ թեկնածու, էներգետիկ ենթակառուցվածքների եւ բնական պաշարների նախարարի պաշտոնակատար Գարեգին Բաղրամյանը՝ պատասխանելով «Բարգավաճ Հայաստան» կուսակցության պատգամավոր Միքայել Մելքումյանի հարցին։

Նրա խոսքով՝ իրենց կողմից «Գազպրոմ Արմենիա» ՓԲԸ-ին ներկայացվել են մի քանի առաջարկություններ գազի սակագների վերաբերյալ, եւ եթե անհրաժեշտություն առաջանա, այդ առաջարկությունները կարող են ներկայացվել հանրության դատին։ Ընդ որում, նախարարի պաշտոնակատարը հավելել է, որ նախատեսում են քննարկել նաեւ երկար ժամկետի սահմանման հարցը, որի ընթացքում կգրանցվեն նաեւ ներդրումային նախագծեր, ինչպես նաեւ վերջնարդյունքներ։