Գրող Միշել Ուելբեկը Ֆրանսիայի նախագահ Էմանուել Մակրոնից ստացել է երկրի բարձրագույն պարգեւը՝ Պատվավոր լեգիոնի շքանշանը: Հինգշաբթի երեկոյան կատարված արարողության մասին հաղորդում է France Info-ն: 63-ամյա ֆրանսիացին շքանշանի ասպետի աստիճան է ստացել:
Ուելբեկը նախագահի նստավայր է ժամանել իր երիտասարդ կնոջ եւ մի շարք ընկերների ուղեկցությամբ, մասնավորապես երգիչ եւ երաժիշտ Ժան Լուի Օբերի:
Արարողությանը ներկա են եղել Ֆրանսիայի նախագահ Նիկոլա Սարկոզին եւ գրող Ֆրեդերիկ Բեգբեդերը:
Բարձրագույն շքանշանը հանձնելով՝ Մակրոնն ընդգծել է, որ Ուելբեկի ստեղծագործությունը վկայում է այն մասին, որ նա «ռոմանտիկ է մի աշխարհում, որը դարձել է խիստ նյութական»: Նա նաեւ վստահություն է հայտնել, որ գրողի ստեղծագործությունները հոռետեսական չեն, այլ լի են լավագույն ապագայի հույսերով:
Ուելբեկն այսօր ամենաշատ թարգմանվող ֆրանսիացի գրողն է: Տարվա սկզբին թողարկված նրա վերջին «Սերոտոնին» վեպը մեծ հաջողություն է վայելում նաեւ ֆրանսալեզու երկրներում: «Ֆրանս Պրեսի» տվյալներով այնտեղ վաճառվել է գրքի մոտ 800 հազար օրինակ:
