Դեռեւս անցած տարվա մայիսին Փաշինյանը Ստեփանակերտում հայտարարեց, որ անելու է ամեն ինչ, որպեսզի Արցախը վերադառնա բանակցությունների սեղան, բայց դա ընդամենը խոստում էր: Այդ մասին այսօր՝ ապրիլի 19-ին, ասաց ՀՀԿ մամուլի խոսնակ Էդուարդ Շարմազանովը՝ անդրադառնալով արցախյան հակամարտության բանակցային գործընթացում իշխանությունների գործունեությանը:
Շարմազանովը հիշեցրեց, որ Վիենայում Փաշինյան Ալիեւի հանդիպմանը Արցախը որպես բանակցային կողմ ներկայացված չէր. «Օն-լայն հետեւում էինք այդ հանդիպմանը, մտնում է Փաշինյանը, գալիս է Ալիեւը, նստած սպասում ենք, որ Բակո Սահակյանն է գալու, մեկ էլ տեսնենք չկա Բակո Սահակյանը: Այ պարոն Փաշինյան ջան, բա դու էիր ասել, որ ամեն ինչ պետք է անեմ, որ Բակո Սահակյանը մասնակցի, բա ո՞ւր ա: Ինչի բա մեկ տարվա ընթացքում չես կարողացել անել, որ Արցախը վերադառնա բանակցային գործընթաց: Որովհետեւ նոր իշխանությունների մոտ ամեն ինչը ձեւն է, ամբողջությամբ ձեւ»:
Շարմազանովը նաեւ համեմատեց Նիկոլ Փաշինյանին Հին Հռոմի հեղակավարների հետ, միաժամանակ ընդգծելով տարբերությունները. «Գիտե՞ք՝ ինչով է տարբերվում Նիկոլ Փաշինյանը Հին Հռոմեական ղեկավարներից: Հին Հռոմում տալիս էին հաց ու տեսարաններ, բայց տեսարաններն էլ ճաշակով էին տալիս: Մեր մոտ Նիկոլ Փաշինյանի իշխանությունը չունի հաց, որ տա ժողովրդին, հացը միայն իրենց համար է պրեմիաների տեսքով, տեսարանն էլ ինչքան ուզես, այն էլ անճաշակ»: