Ապրիլի 19-ին Ազգային ժողովն առաջին ընթերցմամբ հավանություն տվեց «Պետական տուրքի մասին» եւ «Գործունեության իրականացումն իրազեկելու մասին» օրենքներում լրացումներ կատարելու մասին օրինագծերի փաթեթի, փոխանցում է NEWS.am-ի թղթակիցը:
Նշենք, որ կառավարության նախաձեռնությամբ օրինագծերի այս փաթեթով առաջարկվում է 22 հազար դրամ մաքսատուրք սահմանել Իրանից եւ այլ երկրներից Հայաստան ներմուծվող ցեմենտի մեկ տոննայի համար: Կառավարությունը դա հիմնավորում է տեղական արտադրողների մրցունակությանն աջակցելու ցանկությամբ՝ ձեռնարկությունների փակում թույլ չտալու նպատակով:
Սակայն «Բարգավաճ Հայաստան» կուսակցության պատգամավորների եւ նրա նախագահ, օլիգարխ Գագիկ Ծառուկյանի կարծիքով, ում պատկանում է ցեմենտ արտադրող երկրի ամենախոշոր ձեռնարկությունը՝ «Արարատցեմենտը», այս միջոցները բավարար չեն: Նրանք, մասնավորապես, պահանջում էին մաքսատուրքեր սահմանել նաեւ ցեմենտային կլինկերի համար, որը ցեմենտի արտադրության ժամանակ միջանկյալ արտադրանք է:
Այս առաջարկը քննադատվեց իշխող «Իմ քայլը» դաշինքի պատգամավորների կողմից, որոնք մտավախություն հայտնեցին, որ Ծառուկյանն, ըստ էության, միայն ցանկանում է շուկայում իր դիրքերն ամրապնդել՝ դրանով այն մենաշնորհելու իրական սպառնալիք ստեղծելով:
Նշենք, որ օրինագծերի փաթեթին կողմ է քվեարկել 78 խորհրդարանական, դեմ՝ 42, ի դեմս «Բարգավաճ Հայաստանի» եւ «Լուսավոր Հայաստանի» պատգամավորների: