Ես չեմ կարծում, որ համենայն դեպս այս տարվա մեջ կարող է պատերազմ սկսել։ Այս մասին այսօր՝ ապրիլի 19-ին, լրագրողների հետ հանդիպմանն ասաց ԼՂՀ Պաշտպանության բանակի նախկին հրամանատար, գեներալ–լեյտենանտ Սամվել Բաբայանը։
«Խնդիրն այն է, որ դրսի համար պոպուլիստական հայտարարություններն անել, ներքին լսարանի համար մեկ այլ բան խոսել, Ադրբեջանի ոճն է եղել»,–նշեց նա։
Հիշեցնենք, որ Արցախի պաշտպանության նախկին նախարար, Արցախի արտակարգ իրավիճակների պետական ծառայության տնօրեն Լեւոն Մնացականյանը կարծիք էր հայտնել, որ շուտով պատերազմ է լինելու։
Սամվել Բաբայանը, սակայն, շեշտում է՝ մադրիդյան սկզբունքներով ԼՂ հիմնախնդիրն անհնար է լուծել. «Երբ ես սա ասում եմ, հայտարարում են, թե բա անցավ մի ճամբար, Բաբայանը էս մեկին ա պաշտպանում։ Չի եղել ժամանակ, որ Բաբայանը ինչ–որ մեկին պաշտպանի։ Արդեն 4–րդ իշխանությունն է, ոչ մեկին չեմ պաշտպանել, չեմ պաշտպանում, միշտ հիշեք դա։ Ես ռեալ, պրակտիկ ասում են այն, ինչ–որ հնարավոր է իրականանա»։
ԼՂՀ Պաշտպանության բանակի նախկին հրամանատարը շեշտում է՝ եթե ՀՀ վարչապետ Նիկոլ Փաշինյանն էլ գնա մադրիդյան սկզբունքների ճանապարհով, հնարավոր չի լինի լուծել խնդիրը. «Լաչինի միջանցքով անհնար է այդ հարցը լուծել։ Դու պետք է ղարաբաղցիներին ասես հավաքեք իրերդ, տեղափոխվեք էս կողմ, տաս Ադրբեջանին։ Ադրբեջանը երեկ հայտարարում է, թե մենք 2011 թվականի կազանի փաստաթղթի շուրջ ենք խոսում։ Երեք նախագահները ոտները այդտեղ ջարդել են, վարչապետն էլ հո չի ջարդի՞, ասում եմ՝ կանգ առեք, էդ ֆորմատով, էդ սկզբունքների շուրջ անհնար է, վերջ։ Չես լսում, գնում ես էդ ճանապարհով, ոտքդ ջարդելու։ Գնացեք, ես չեմ խանգարում, բայց իրավունք ունեմ չէ տեսակետ հայտնելու»։
Հիշեցնենք, որ ԼՂ հակամարտության կարգավորման մադրիդյան սկզբունքներով առաջարկվում է նախկին ԼՂԻՄ շրջապատող տարածքների հանձնում Ադրբեջանին, Լեռնային Ղարաբաղի միջանկյալ կարգավիճակ, նրա անվտանգության եւ ինքնակառավարման երաշխիքների տրամադրումով, Հայաստանը Լեռնային Ղարաբաղին կապող միջանցք, Լեռնային Ղարաբաղի վերջնական իրավական կարգավիճակի հետագա սահմանում իրավականորեն պարտադիր կամարտահայտման միջոցով, Ներքին տեղահանված եւ փախստականների՝ իրենց բնակության նախկին վայրերը վերադառնալու իրավունք,
Անվտանգության միջազգային երաշխիքներ, որոնք կներառեն նաեւ խաղաղապահ գործունեություն։