Հայաստանում ավիատոմսերի թանկ լինելը երկրում ամենաշատ քննարկվող թեմաներից մեկն է: Ապրիլի 19-ին ԱԺ նիստում Տնտեսական մրցակցության պաշտպանության պետական հանձնաժողովի նախագահի նշանակման հարցի քննարկման ժամանակ այս մասին ասաց այս պաշտոնի թեկնածու Գեղամ Գեւորգյանը՝ պատասխանելով «Իմ քայլը» դաշինքի պատգամավոր Միքայել Զոլյանի հարցին:
Գեւորգյանի կարծիքով՝ քաղաքացիներին հուզող այս հարցին պատասխանելու համար անհրաժեշտ է նախ ուսումնասիրել, թե արդյոք դա կապված է որեւէ լրացուցիչ ծառայության թանկության հետ: «Հնարավոր է եւ, որ սա միանգամայն անօրինական է: Մենք պետք է նաեւ հասկանանք, թե ինչու են այդ տոմսերն այդքան թանկ, եւ եթե կան բարեխիղճ մրցակցություն ապահովող օրենսդրության ակնհայտ խախտումներ, ապա այս հարցն անպայման պետք է մանրամասն հետազոտել»,- պարզաբանեց թեկնածուն:
Նա խոստացավ, որ ընտրվելու դեպքում այս հարցը կլինի իր ուշադրության կենտրոնում: